Qytaı SІM Baspasóz qyzmetiniń jetekshisi: AQSh — tek qaǵaz jolbarys, túrtip qalsa tesiledi

ASTANA. KAZINFORM — Qytaı Syrtqy ister mınıstrligi Baspasóz qyzmetiniń jetekshisi Mao Nın áleýmettik jelide QHR-nyń negizin qalaýshy Mao Tszedýnnyń «AQSh — tek qaǵaz jolbarys, túrtip qalsaq tesiledi» degen áıgili sózin eske túsiretin jazba jarııalady. 

Mao Nın 11 sáýir kúni tańerteń X platformasynda: «Qytaı eshqashan qoqan-loqy jasamaıdy — al ondaılardy biz birden tanımyz» dep jazdy.

Bul jazbaǵa qosa salynǵan sýrette Mao Tszedýnnyń 1964 jylǵy málimdemesiniń aǵylshynsha mátini keltirilgen:

— AQSh keı elderdi qorqytyp, olardyń bizben saýda jasasýyna jol bermeı otyr. Biraq Amerıka — tek qaǵaz jolbarys, sender oǵan senim artpańdar, ol túrtip qalsaq tesilgeli tur.

Sóıtip, AQSh pen Qytaı arasyndaǵy saýda janjaly órshigennen beri Mao Nın X platformasynda qatarynan eki kún boıy Mao Tszedýnnyń «qanatty sózderimen» bólisti.

10 sáýir kúni ol Mao Tszedýnnyń 1953 jyly aqpanda Qytaı Halyqtyq saıası konsýltatıvtik keńesiniń jınalysynda sóılegen sózinen beıneúzindi jarııalaǵan bolatyn. Beıneúzindide Mao Tszedýn Koreı soǵysy týraly bylaı deıdi:

— Bul soǵystyń qansha ýaqytqa sozylatynyn biz sheshpeımiz. Bul máseleni buǵan deıin Trýmen sheshken, endi Eızenhaýer nemese Qurama Shtattardyń bolashaq prezıdentteri sheshe jatar. ıAǵnı, olar bul soǵysty qansha ýaqytqa deıin jalǵastyramyz dese, biz de sonsha ýaqytqa — tolyq jeńiske jetkenge deıin jalǵastyramyz!

Mao Nınnyń bul jazbasy X jelisinde qazirge deıin 10 mıllıonnan astam qaralym jınap úlgerdi.

Qytaıda jeli qoldanýshylary X platformasyna kire almaıdy. Biraq soǵan qaramastan beısenbi kúni bul jańalyq birqatar qytaılyq BAQ-ta jarııalady. «Mao Nın tóraǵa Maonyń asqaq lebizin eske túsiretin beınejazbamen bólisti» degen aqparat Qytaıdyń ınternet keńistiginde dúmpý týdyryp, qyzý talqylanyp jatyr.

Buǵan deıin Qytaı SІM resmı ókiliniń «AQSh-tyń óktemdigine jol bere almaımyz» dep málimdegenin jazǵan bolatynbyz.