Qytaı SІM: áskerı jattyǵý — zańdy, qajetti jáne oryndy qadam

ASTANA. KAZINFORM —  QHR qarýly kúshteri 17 naýryz kúni Taıvan buǵazyna taıaý teńiz aıdynynda áskerı jattyǵý ótkizdi. Qytaı Syrtqy ister mınıstrligi atalǵan áskerı áreketti AQSh-tyń Taıvanǵa qatysty ustanymyndaǵy óreskel sheginiske jáne «Taıvan táýelsizdigin» jaqtaıtyn kúshterdiń arandatýshylyq áreketterine berilgen jaýap dep atady.

Búgin ótken baspasóz máslıhatynda Qytaı SІM-niń resmı ókili Mao Nın Qytaı qarýly kúshteriniń Taıvan mańyndaǵy áskerı jattyǵýyna qatysty pikir bildirdi.

Jýrnalısterdiń tıisti suraqtaryna jaýap bere otyryp, ol AQSh-tyń sońǵy áreketterin synǵa aldy.

— Jaqynda AQSh Taıvan máselesinde birqatar qate qadam jasady, ásirese AQSh Memlekettik departamentiniń resmı saıtyndaǵy AQSh-Taıvan qarym-qatynasyna qatysty tizimdemeniń mazmunyna ózgeris engizip, «Bir Qytaı» qaǵıdatyn ustaný jáne «Taıvan táýelsizdigin» qoldamaý týraly mańyzdy tujyrymdardy alyp tastady. Bul — AQSh-tyń «Taıvandy Qytaıǵa qarsy paıdalanýdan» bas tartpaı, «Taıvan táýelsizdigi» kúshterin aıtaqtap, aıdap salyp otyrǵanynyń taǵy bir suryqsyz dáleli, — dedi Mao Nın.

Resmı ókil Taıvan mańynda ótken áskerı jattyǵýdy eldiń egemendigi men aýmaqtyq tutastyǵyn qorǵaýǵa baǵyttalǵan «zańdy, qajetti jáne oryndy qadam» dep atap ótti.

— Bul — «Taıvan táýelsizdigin» jaqtaıtyn syrtqy kúshterdiń áreketine berilgen qatań jaýap, «Taıvan táýelsizdigin» maqsat etken separatıstik kúshterge berilgen qatal eskertý, — dedi Mao Nın.

Mao Nın Qytaı úshin Taıvan máselesinen óter ózekti múdde joq ekenin atap ótti.

— Bir Qytaı qaǵıdaty — Qytaı-AQSh qatynastarynyń saıası irgetasy. Іrgetas berik bolmasa, eki eldiń baılanysy ýshyǵa bermek. «Taıvan táýelsizdigi» men Taıvan buǵazynyń beıbitshiligi bir-birine múlde kereǵar. «Taıvan táýelsizdigin» jaqtaýshylardyń aldy tuıyq, arty jar, al «Taıvandy Qytaıǵa qarsy paıdalaný» — otpen oınaǵandaı qaýipti áreket», — dep málimdedi Mao Nın.

Resmı ókil AQSh-ty «Bir Qytaı» qaǵıdatyn berik ustanyp, Qytaı men AQSh arasyndaǵy 3 birlesken málimdemeniń talaptaryn saqtaýǵa, Taıvan máselesine baılanysty buǵan deıin berilgen ýádelerdi oryndaýǵa, sondaı-aq Taıvan buǵazynyń turaqtylyǵyna qaýip tóndiretin arandatýshylyq áreketterden bas tartyp, Taıvan buǵazynyń beıbitshiligi men Qytaı-AQSh qarym-qatynasyna zııan tıgizetin áreketterden aýlaq bolýǵa shaqyrdy.

Aıta ketelik Qytaı qorǵanys mınıstrligi Taıvanǵa eskertý jasaǵan edi.