Qytaı SІM AQSh pen Japonııanyń birlesken málimdemesine qatysty pikir bildirdi
ASTANA. KAZINFORM – Qytaı Syrtqy ister mınıstrliginiń resmı ókili Go Tszıakýn AQSh pen Japonııanyń birlesken málimdemesine qatysty pikir bildirdi. Bul týraly vedomstvonyń resmı saıty málimdedi.
Onyń aıtýynsha, birlesken málimdemede Qytaıǵa qatysty máselelerdiń tilge alynýy Qytaıdyń ishki isine kópe-kórneý kıligý, Qytaıdy kúıeleý men qaralaý, aımaqtyq shıelenisti ýshyqtyrý bolmaq. Qytaı buǵan qatań narazylyq jáne batyl qarsylyq bildiredi.
- Taıvan máselesi – Qytaıdyń ishki isi, Qytaıdyń negizgi múddeleriniń ózegi, sondyqtan oǵan syrtqy kúshterdiń aralasýyna jol berilmeıdi. AQSh ta, Japonııa da Taıvan máselesi boıynsha Qytaıǵa resmı ýáde bergen. Ásirese Japonııanyń tarıhta Taıvanǵa shapqynshylyq jasaǵan jáne otarlyq ústemdik júrgizgen aýyr qylmysy bar, sol úshin Taıvan máselesinde aıryqsha abaı bolǵany jón. Qazirgi ýaqytta Taıvan buǵazyndaǵy beıbitshiliktiń saqtalýyna basty qater «Taıvan táýelsizdigi» separatıstik áreketterinen jáne olarǵa syrttan jasalǵan qoldaý men qolpashtaýdan tónip otyr. Eger tıisti elder shynymen beıbitshilik pen turaqtylyq úshin alańdaýshylyq bildirse, Bir Qytaı qaǵıdatyn berik ustanyp, «Taıvan táýelsizdigine» ashyq qarsy turýy kerek, - dep atap kórsetti Go Tszıakýn.
Resmı ókildiń pikirinshe, Taıvan aımaǵynyń halyqaralyq uıymdar qyzmetine atsalysýy da Bir Qytaı qaǵıdatyna sáıkes iske asyrylýy qajet. Egemendi elder ǵana qatysa alatyn halyqaralyq uıymdarǵa qosylýǵa Taıvannnyń eshqandaı negizi, ýáji jáne quqyǵy joq.
Ol Dıaoıýıdao (Japonııa Senkaký dep ataıdy) araly men onyń aınalasyndaǵy aralshalardyń ejelden Qytaı jeri ekenin eske saldy.
- Qytaı ejelden Dúnıejúzilik saýda uıymynyń erejesine sáıkes áreket etedi, aıtalǵan Qytaıdyń «ekonomıkalyq agressııasy» degenimiz oıdan shyǵarylǵan dalbasa, - dep túıindedi sózin resmı ókil.
RFI-diń habarlaýynsha, Japonııanyń premer-mınıstri Sıgerý Isıba men AQSh Prezıdenti Donald Tramp 7 aqpan kúni Vashıngtondaǵy Aq úıde kezdesý ótkizip, taraptar qarym-qatynasynyń jańa altyn dáýirine jol ashýǵa baǵyttalǵan birlesken málimdemege qol qoıǵan. Málimdemede taraptar Taıvan buǵazynda beıbitshilik pen turaqtylyqty saqtaýdyń mańyzdylyǵyn atap ótip, qalyptasqan jaǵdaıdy kúsh qoldaný nemese tize batyrý arqyly bir jaqty ózgertýge qarsylyq bildirgen; Taıvannyń halyqaralyq uıymdarǵa tolyqtaı qatysýyna qoldaý kórsetken. Málimdemede sondaı-aq «AQSh-Japonııa qaýipsizdik shartynyń» 5-shi babynyń Senkaký (Dıaoıýıdao) aralyna da qoldanylatyny atap kórsetilip, Qytaıdyń Ońtústik Qytaı teńizindegi zańsyz talaptaryna, ásirese rıfterdi áskerılendirý men baqa da arandatý, ses kórsetý áreketterine qarsylyq bildirilgen. Buǵan qosa AQSh tarpy Qytaıdyń «ekonomıkalyq agressııasyna» qarsy kúreste odaqtastarymen yntymaqtastyqty kúsheıtetinin de málimdegen.