Qytaı syrtqy ister mınıstri: Azııa – iri derjavalardyń oıyn alańy emes
ASTANA. KAZINFORM - Qytaıdyń syrtqy ister mınıstri Van I Azııa iri derjavalar aıtysyp-tartysatyn oıyn alańy emes, halyqaralyq yntymaqtastyqtyń jarqyn úlgisine aınalýy kerektigin málimdedi dep habarlaıdy Kazinform tilshisi QHR Syrtqy ister mınıstrliginiń resmı saıtyna silteme jasap.
7 naýryz kúni Búkilqytaı halyq ókilderi jınalysynyń baspasóz máslıhatynda syrtqy ister vedomstvosynyń basshysy Van I Qytaıdyń kórshiles eldermen qarym-qatynasy týraly toqtalǵanda, Azııa Qytaıdyń turlaýly tuǵyry, sondaı-aq azııalyq elderdiń ortaq mekeni ekenin atap ótti.
Onyń aıtýynsha, Qytaı qazirge deıin tóńiregindegi 17 elmen «ortaq taǵdyr qaýymdastyǵy» qurý týraly ýaǵdalastyqqa qol jetkizdi, Ońtústik-Shyǵys Azııa men Ortalyq Azııada «ortaq taǵdyr qaýymdastyǵynyń» eki iri klasteri qalyptasyp úlgerdi.
- Búgingi Qytaı – Azııadaǵy turaqtylyqtyń tiregi, ekonomıkalyq damýdyń qozǵaltqyshy jáne óńirlik qaýipsizdiktiń kepili, – dedi Van I.
Onyń aıtýynsha, kórshiler arasynda usaq-túıek kelispeýshilik bolyp turady, tarıhı máseleler men múddeler qaıshylyǵy laıyqty sheshimin tabýy qajet.
- Qytaı «Yrys aldy — yntymaq» ekenine senedi. Tek «Ortaq meken» ustanymynan aınymaı, «ortaq taǵdyr qaýymdastyǵy» baǵytynan kóz jazbasaq, teń quqyly keńes quryp, bir-birimizge túsinistikpen qaraı bilsek, kez kelgen kelispeýshilik sheshilip, ózara tıimdi yntymaqtastyq ornatýǵa múmkindik týady, - dedi ol.
AQSh-tyń Azııa aımaǵyna orta qashyqtyqtaǵy zymyrandar ornalastyrý nıetine baılanysty Van I Qytaıdyń buǵan úzildi-kesildi qarsy ekenin ári aımaqtaǵy elderdiń de mundaı qadamdy quptamaı qoımaıtynyn aıtty.
- AQSh-tyń «Úndi-Tynyq muhıty strategııasy» iske qosylǵaly birneshe jyldyń júzi boldy. Biraq ol aımaq elderine ne berdi? Azııa iri derjavalar aıtysyp-tartysatyn oıyn alańy emes, halyqaralyq yntymaqtastyqtyń jarqyn úlgisine aınalýy kerek. Biz ashyq aımaqshyldyqty (regıonalızm) quptaımyz, ózara qurmet pen tıimdilik qaǵıdaty negizinde Azııanyń damý múmkindigin teń bólisýdi qalaımyz, - dedi ol.
Osyǵan deıin Van I Qytaı Shanhaı yntymaqtastyq uıymynyń (ShYU) kezekti tóraǵasy retinde 100-den astam is-shara ótkizetinin habarlady.