Qytaı Syrtqy ister mınıstri AQSh-ty tarıfter men saýda soǵysy saıasatyn qaıta qaraýǵa shaqyrdy

ASTANA.KAZINFORM — «Eki sessııa» aıasynda ótken brıfıngte QHR Syrtqy ister mınıstri Van I Qytaıdyń tarıf máselesine qatysty ustanymyn aıtty, dep habarlaıdy Kazinform tilshisi.

— AQSh osy jyldardaǵy tarıfter men saýda soǵystarynan ne utqanyn taldaýy kerek. Saýda tapshylyǵy ósti me, álde tómendedi me? Óndiristiń básekege qabilettiligi ósti me, álde tómendedi me? Inflıatsııa jaqsara ma, álde nasharlady ma? Adamdardyń ómiri jaqsardy ma, álde nasharlady ma, — dedi Van I.

Ol Qytaı men AQSh ekonomıkalyq jáne saýda qarym-qatynasy ózara baılanysty ekenin basa aıtty. Eger AQSh yntymaqtassa, eki jaq ta tıimdi jáne utymdy nátıjelerge qol jetkizedi, al qysym jasalsa, Qytaı oǵan tabandy túrde qarsy turady.

Aıta keteıik, naýryz aıynda Qytaı bıligi AQSh-tyń Qytaıdan keletin taýarlaryna qosymsha baj salyǵyn engizýine baılanysty DSU daýlardy retteý mehanızmin iske qosqan bolatyn.

Osy aptada Beıjińde búkilqytaılyq halyq ókilderi jınalysynyń (Búkilqytaılyq halyq ókilderi jınalysy, parlament) jáne Qytaı halyqtyq saıası konsýltatıvtik keńesiniń (QHKK) jyl saıynǵy sessııalary ashyldy.

Buǵan deıin habarlanǵandaı, Qytaıdyń JІÓ ósý qarqyny 2025 jyly shamamen 5%.