Qytaı Sırııada tez arada turaqtylyq ornaıdy dep úmittenedi - Qytaı SІM

ASTANA. KAZINFORM - Qytaı Sırııadaǵy oqıǵalardy jiti baqylaýda. Bul týraly jeksenbi kúni Qytaı Syrtqy ister mınıstrliginiń resmı saıtynda jarııalanǵan málimdemede aıtylǵan, dep habarlaıdy Kazinform agenttiginiń menshikti tilshisi.

Onda Qytaıdyń Sırııadaǵy jaǵdaıdy jiti qadaǵalap otyrǵany jáne Sırııadaǵy turaqtylyq tezirek qalpyna keletinine úmittenetini atap ótilgen.

- Biz Sırııadaǵy tıisti taraptardy Sırııadaǵy Qytaı mekemeleri men personalynyń qaýipsizdigin qamtamasyz etý úshin praktıkalyq sharalar qabyldaýǵa shaqyramyz, - delingen habarlamada.

Buǵan deıin EO-nyń Eýropalyq syrtqy áreket qyzmeti Sırııadaǵy jaǵdaıǵa qatysty qysqasha málimdeme jasaǵan bolatyn.

Sırııalyq oppozıtsııa Damaskiniń Asad rejıminen azat etilgenin jarııalady.

Sırııa prezıdenti Bashar Asad jeksenbi kúni Damaskiden belgisiz baǵytqa ushyp ketti. Sırııadaǵy adam quqyqtaryn baqylaý ortalyǵy onyń senbi kúni keshki saǵat onda qaladan shyqqanyn habarlady.