Qytaı sırek jer elementteri tehnologııalaryna eksporttyq baqylaýdy kúsheıtedi
ASTANA. KAZINFORM – Qytaı jerdiń sırek elementterine qatysty ónimder men tehnologııalarǵa eksporttyq baqylaýdyń jańa sharalary engizilgenin jarııalady, dep habarlaıdy QHR Saýda mınıstrligi.
Mınıstrlik beısenbi kúni eksporttyq baqylaý máseleleri boıynsha eki resmı habarlama jarııalady. Birinshi qujatqa (No61) sáıkes, eger olar sırek jer elementterine qatysty bolsa, quramynda Qytaıdan shyqqan komponentteri bar sheteldik taýarlarǵa shekteý qoldanylady.
Vedomstvo ókili atap ótkendeı, sońǵy kezde jekelegen sheteldik uıymdar men jeke tulǵalar mundaı materıaldardy tikeleı nemese óńdegennen keıin úshinshi tulǵalarǵa berip, olar áskerı jáne basqa da názik salalarda paıdalanǵan. Onyń aıtýynsha, bul áreketter Qytaıdyń ulttyq qaýipsizdigine nuqsan nemese qaýip tóndirdi jáne halyqaralyq turaqtylyqqa teris áser etti. Sondyqtan úkimet ulttyq múddelerdi qorǵaý jáne ıadrolyq qarýdy taratpaý jónindegi halyqaralyq mindettemelerin oryndaý úshin mundaı taýarlarǵa eksporttyq baqylaý ornatý týraly sheshim qabyldady.
Jańa sharalarmen qamtylǵan ónimder tizimi shekteýli. Bul rette medıtsınalyq kómek, densaýlyq saqtaý salasyndaǵy tótenshe jaǵdaı nemese apatty joıýǵa qajetti eksport lıtsenzııalaýdan bosatylady.
Ekinshi habarlama (№ 62) sırek jer elementterine qatysty tehnologııalarǵa eksporttyq baqylaýdy engizedi.
- Sheteldik uıymdar men jeke tulǵalar Qytaıdan zańsyz túrde tıisti tehnologııalardy alyp, ony áskerı materıaldar óndirýge paıdalanǵan. Jańa sharalar osyndaı táýekelderdiń aldyn alýǵa, ulttyq qaýipsizdikti nyǵaıtýǵa jáne sırek jer materıaldaryn jetkizýdiń jahandyq tizbeginiń turaqtylyǵyn qamtamasyz etýge baǵyttalǵan, - dep atap ótti vedomstvo ókili.
Eki qujat jarııalanǵan sátten bastap kúshine enedi.
Eske salsaq, tamyz aıynda Qytaı bıligi sırek kezdesetin metaldardy óndirýge, balqytýǵa jáne qaıta óńdeýge baqylaýdy kúsheıtýge baǵyttalǵan ýaqytsha erejelerdi jarııalady.
Buǵan deıin Qytaıda sırek kezdesetin iri metall kenishi tabylǵanyn jazǵan bolatynbyz.