Qytaı sırek metall eksportyna qoıylǵan shekteýdi jeńildetýi múmkin
ASTANA. KAZINFORM — Qytaıdyń Saýda mınıstrligi Eýropanyń chıp óndirýshi kompanııalarymen sırek jer elementteriniń eksportyn baqylaý máselesi boıynsha baılanysty kúsheıtýde, bul eýropalyq chıp óndirýshilerge qatysty eksporttyq shekteýdiń jeńildetilýi múmkin ekenin meńzeıdi.
«China Daily» gazetiniń habarlaýynsha, 27 mamyr kúni Saýda mınıstrligi Qytaı men Eýropanyń jartylaı ótkizgish ónerkásibi salasynyń ókilderimen kezdesý ótkizip, sırek jer elementterine baılanysty eksporttyq shekteý saıasaty týraly túsinikteme bergen ári eýropalyq chıp óndirýshilermen tıisti másele boıynsha baılanysty nyǵaıtýǵa nıet bildirgen.
— Saýda mınıstrliginiń janyndaǵy Ónerkásiptik qaýipsizdik jáne eksporttyq baqylaý bıýrosynyń mamandary kezdesýde sırek jer elementterine qatysty eksporttyq shekteý saıasaty týraly úgit júrgizip, eksporttyq lıtsenzııalardy qalaı alýǵa bolatynyn túsindirdi, — degen «China Daily» basylymyna aqparat bergen ınsaıderlerdiń biri.
Kelesi derekkózdiń aıtýynsha, bul qadam Qytaı men Eýropanyń jartylaı ótkizgish kompanııalary arasyndaǵy óndiristik tizbekke qatysty sırek jer elementteriniń eksportyna engizilgen shekteýdiń jeńildetilýi múmkin ekenin bildiredi. Al bul jahandyq óndiristik tizbektiń turaqtylyǵyn saqtaýda tıimdi.
Qytaı Saýda mınıstrliginiń resmı saıtyndaǵy habarlamaǵa sáıkes, seısenbi kúni ótken kezdesýge vedomstvonyń tıisti departamentteriniń, Qytaıdyń jartylaı ótkizgish ónerkásibi qaýymdastyǵynyń, Qytaı-Eýroodaq Saýda palatasynyń, sondaı-aq, saladaǵy 40-tan astam qytaılyq jáne eýropalyq kásiporynnyń ókilderi qatysty.
Habarlamada aıtylǵandaı, kezdesý Qytaı men Eýropanyń jartylaı ótkizgish salasyndaǵy óndirýshiler men jetkizýshilerdiń ózara túsinistigin arttyrýǵa, bızneske senimdi nyǵaıtýǵa jáne yntymaqtastyqty tereńdetýge alań usyndy. Qytaı men Eýropanyń jartylaı ótkizgish salasyndaǵy baılanysy men yntymaqtastyǵynyń nyǵaıýy álemdik ekonomıkanyń qalpyna kelýine jańa serpin beredi.
Sırek jer elementteri jartylaı ótkizgishter óndirisinde aıryqsha oryn alady. Nikkei Asian Review usynǵan derekterge sáıkes, Qytaı bıligi 4 sáýirden bastap jartylaı aýyr sırek jer elementteriniń 7 túrine eksporttyq shekteý engizgennen keıin, eýropalyq naryqta olardyń baǵasy bir aı ishinde úsh ese ósken.
Sırek jer elementteriniń eýropalyq baǵasy Qytaıdan tys aımaqtaǵy basty naryqtyq kórsetkish retinde qarastyrylady.