Qytaı sırek kezdesetin metaldarǵa qatysty eksporttyq baqylaý sharalaryn qorǵady
ASTANA. KAZINFORM - Qytaı Halyq Respýblıkasynyń Kommertsııa mınıstrligi jeksenbi kúni eldiń sırek kezdesetin elementter men onymen baılanysty ónimderge qatysty eksporttyq baqylaý sharalaryn qorǵap, bul qadamdardyń zańdy jáne negizdelgen ekenin málimdedi, dep habarlaıdy Sınhýa.
Kommertsııa mınıstrligi AQSh-ty túsinispeýshilikterdi ózara qurmet pen teń quqyly konsýltatsııalar jáne pikirtalas negizinde durys retteýge shaqyrdy.
Saýda mınıstrliginiń resmı ókili málimdegendeı, Qytaı jaýapty iri memleket retinde eksporttyq baqylaý sharalaryn zań aıasynda engizip otyr. Bul sharalar jahandyq beıbitshilikti saqtaý, óńirlik turaqtylyqty qamtamasyz etý jáne halyqaralyq mindettemelerdi, sonyń ishinde taratpaý qaǵıdattaryn oryndaýǵa baǵyttalǵan.
«Eksporttyq baqylaý — bul eksportqa tyıym salý emes», — deı kele mınıstrlik ókili tıisti talaptarǵa saı ótinimderge lıtsenzııa beriletinin atap ótip.
Onyń aıtýynsha, Qytaı tıisti sharalardy jarııalar aldynda eksporttyq baqylaýǵa qatysty ekijaqty dıalog tetikteri arqyly múddeli elder men óńirlerdi habardar etken.
Mınıstrlik ókili Qytaıdyń basqa eldermen eksporttyq baqylaý máseleleri boıynsha dıalog pen pikir almasýdy jandandyrýǵa daıyn ekenin, bul jahandyq óndiristik jáne jetkizý tizbekteriniń qaýipsizdigi men turaqtylyǵyn qamtamasyz etýge sep bolatynyn aıtty.
AQSh-tyń Qytaı taýarlary men barlyq mańyzdy degen baǵdarlamalyq qamtamasyz etýdiń eksporttyq baqylaý sharalaryna jáne 100 paıyzdyq baj salyǵyn engizýge qatysty pikir bildirgen Qytaıdyń Kommertsııa mınıstrliginiń ókili AQSh-tyń uzaq ýaqyt boıy ulttyq qaýipsizdik tujyrymyn asyra siltep, eksporttyq baqylaý sharalaryn teris qoldanyp, Qytaıdy alalaýshy áreketterge barǵanyn atap ótti.
«AQSh Qytaıǵa qatysty kemsitýshilik sıpattaǵy qadamdar jasap, jartylaı ótkizgish jabdyqtar men chıpter sekildi ónimderge qatysty «uzyn qol ıýrısdıktsııasyn» zańsyz qoldandy», — dedi ol.
Mınıstrlik ókiliniń aıtýynsha, bıyl qyrkúıekte Madrıdte ótken Qytaı-AQSh saýda-ekonomıkalyq kelissózderinen keıin bar-joǵy 20 kún ishinde AQSh Qytaıǵa qarsy jańa shekteý sharalaryn engizgen. Bul onyń aıtýynsha, Qytaı múddelerine aıtarlyqtaı nuqsan keltirip, ekijaqty kelissózderdiń jaǵdaıyn nasharlatqan.
«Qytaımen qarym-qatynasta joǵary kedendik tarıftermen qorqytý durys tásil emes. Bizdiń ustanymymyz ózgermeıdi, Qytaı tarıftik soǵysty qalamaıdy, biraq odan qoryqpaıdy da», — dedi ol.
Qytaı AQSh-ty óz qateligin dereý túzetip, eki el basshylary arasyndaǵy telefon arqyly qol jetkizilgen ýaǵdalastyqtardy saqtaýǵa, konsýltatsııalar nátıjesin qorǵaýǵa jáne teń dárejedegi dıalog arqyly kelispeýshilikterdi sheshýge shaqyrdy.
«Eger AQSh qate baǵyttan taımasa, Qytaı óz zańdy quqyqtary men múddelerin qorǵaý úshin batyl sharalar qabyldaıdy», — dep túıindedi QHR Saýda mınıstrliginiń resmı ókili.
Osyǵan deıin AQSh-tyń Qytaı taýarlaryna 1 qarashadan bastap 100% baj salyǵyn engizetini týraly jazdyq.