Qytaı sırek kezdesetin metaldarǵa baqylaýdy kúsheıtedi

ASTANA.KAZINFORM - Qytaı bıligi sırek kezdesetin metaldardy óndirýge, balqytýǵa jáne qaıta óńdeýge baqylaýdy kúsheıtýge baǵyttalǵan ýaqytsha erejelerdi jarııalady, dep habarlaıdy Sınhýa.

Jańa erejelerge sáıkes memleket jyl saıyn sırek kezdesetin jer elementterin óndirýge jáne óńdeýge kvota belgileıtin bolady. Bul kvotalar ulttyq damýdyń basymdyqtaryn, qorlardyń kólemin jáne olardyń sorttaryn, ekologııalyq talaptardy, naryqtyq suranysty jáne salanyń perspektıvalaryn eskere otyryp, kásiporyndar arasynda bólinetin bolady.

Kásiporyndarǵa zańdar men ákimshilik reglamentterdi saqtaı otyryp, bekitilgen kvotalar sheginde qatań qyzmet júrgizýge nusqaý beriledi. Sırek jer elementterin óndirýshiler ónimniń qozǵalysyn tirkep, derekterdi memlekettik baqylaý júıesine engizýi kerek.

Jergilikti bılik organdaryna kásiporyndardy qadaǵalaý men tekserýdi kúsheıtý, sondaı-aq qoldanystaǵy zańnama sheńberinde buzýshylyqtardyń jolyn kesý usynyldy.

Qujatty ónerkásip jáne aqparattandyrý mınıstrligi damý jáne reformalar jónindegi memlekettik komıtetpen jáne QHR Tabıǵı resýrstar mınıstrligimen birlesip daıyndady.

Esterińizge sala keteıik, sırek kezdesetin metaldar tizimine jalpaq ekrandy teledıdarlardan bastap lazerler men gıbrıdti avtomobılderge deıin joǵary tehnologııalyq ónimderdi óndirýde keńinen qoldanylatyn 17 element kiredi.

Aıta keteıik, Qytaıda sırek kezdesetin iri metall kenishi tabyldy.