Qytaı Shvetsııa azamattary úshin vızasyz rejım engizedi — QHR SІM basshysy
ASTANA. KAZINFORM — Qytaıǵa saıahattaýdy jáne eldiń shynaıy kelbetimen tanysýdy yntalandyrý men qoldaý maqsatynda Qytaı tarapy Shvetsııa azamattary úshin vızasyz kirý rejımin engizýge daıyn, dep habarlaıdy Sınhýa.
Bul týraly beısenbi kúni Beıjińde Qytaıdyń syrtqy ister mınıstri Van I Shvetsııanyń syrtqy ister mınıstri Marııa Malmer Stenergardpen kezdesý barysynda málimdedi.
Van I Shvetsııany Eýropalyq Odaqtaǵy mańyzdy memleket jáne Qytaı Halyq Respýblıkasymen dıplomatııalyq qatynastar ornatqan alǵashqy Batys eli retinde atap ótti.
Onyń aıtýynsha, eki el ózara qarym-qatynastaryn básekelestik emes, áriptestik retinde aıqyndap, kelispeýshilikterden góri yntymaqtastyqqa basymdyq beretin ustanymdy ustanýy qajet.
Dıplomat atap ótkendeı, Qytaı Shvetsııanyń Qytaı-Shvetsııa qatynastaryn táýelsiz jáne derbes strategııalyq oılaý men uzaqmerzimdi kózqarasqa súıene otyryp qarastyrady jáne damytady dep úmittenedi.
Bıyl Qytaı men Shvetsııa arasynda dıplomatııalyq qatynastar ornaǵanyna 75 jyl tolatynyn eske sala otyryp, Van I eki eldiń kóshbasshylary qol jetkizgen kelisimderdi adal iske asyrýǵa, saýda-ekonomıkalyq salalardaǵy ınstıtýtsıonaldyq dıalogti tıimdi paıdalanýǵa, kópjaqty máseleler boıynsha baılanys pen úılestirýdi tereńdetýge jáne saýda men ınvestıtsııa, ǵylymı-tehnıkalyq ınnovatsııalar, tsıfrlyq ekonomıka, jasyl damý, densaýlyq saqtaý sııaqty salalardaǵy naqty yntymaqtastyqty keńeıtýge shaqyrdy.
Marııa Malmer Stenergard óz kezeginde Qytaıǵa 16 jyldan keıin resmı saparmen kelgen Shvetsııanyń alǵashqy syrtqy ister mınıstri bolǵanyna qýanyshty ekenin bildirip, Shvetsııanyń QHR-men qarym-qatynasqa zor mán beretinin jáne «bir Qytaı» saıasatyn ustanatynyn málimdedi.
Ol Shvetsııanyń Qytaımen ózara tıimdi ári teńgerimdi saýda-ekonomıkalyq qatynastardy qurýǵa, saýda men ınvestıtsııa, ǵylymı-tehnıkalyq ınnovatsııalar jáne jasyl transformatsııa salalarynda yntymaqtastyqty nyǵaıtýǵa, sondaı-aq bilim berý men mádenı-gýmanıtarlyq almasýlar salalaryndaǵy áriptestikti tereńdetýge daıyn ekenin atap ótti.
— Mınıstr Qytaı tarabyna shved azamattary úshin vızasyz rejım engizgeni úshin alǵys aıtyp, bul qadam Qytaıǵa saıahattaıtyn shved azamattarynyń sanyn arttyratynyna senim bildirdi, — delingen habarlamada.
Stenergard Shvetsııanyń Qytaıdyń halyqaralyq isterdegi mańyzdy rólin joǵary baǵalaıtynyn jáne Qytaıda Ǵalamdyq áıelder sammıtiniń tabysty ótkenimen quttyqtaıtynyn jetkizdi. Sondaı-aq, Qytaıdyń klımattyń ózgerýine qarsy kúreske arnalǵan ulttyq deńgeıde aıqyndalǵan jańa mindettemesin joǵary baǵalaıtynyn aıtty.
Budan buryn Qytaıdyń qurlyqtyq bóligi Taıvan turǵyndary úshin materıkke kirý tártibin jeńildetý týraly sheshim qabyldaǵany týraly jazǵanbyz.