Qytaı ShYU aıasyndaǵy yntymaqtastyqty 8 baǵyt boıynsha ilgeriletpek
TAShKENT. KAZINFORM — Qytaı tarapy Tashkentte ótken dóńgelek ústel barysynda Shanhaı Yntymaqtastyq Uıymyna (ShYU) tóraǵalyq etý kezeńinde atqaratyn jumystardyń josparymen bólisti, dep habarlaıdy Kazinform agenttiginiń menshikti tilshisi.
Іs-sharaǵa qatysqan Qytaıdyń Ózbekstandaǵy elshisi ıÝı Tszıýn uıym aıasyndaǵy yntymaqtastyqty 8 negizgi baǵyt boıynsha ilgeriletý kózdelgenin aıtty.
— ShYU-nyń saıası salmaǵy arta tústi. Oǵan múshe bolýǵa nıetti elder qatarynyń artyp kele jatqanyn osyǵan dálel. Qytaı óz tóraǵalyǵy kezinde 8 baǵytta yntymaqtastyqty júıeli jolǵa qoıýǵa nıetti. Atap aıtqanda, kedeılik deńgeıin tómendetý, azyq-túlik qaýipsizdigi, densaýlyq saqtaý, jobalardy tıimdi qarjylandyrý, klımattyń ózgerýi, «jasyl» tehnologııalardy engizý, ındýstrııalandyrý jáne tsıfrlyq ekonomıkany damytý. Sondaı-aq, Qytaıdyń tóraǵalyǵymen 40-tan astam otyrys, túrli forýmdar ótkizý josparlanǵan, — dedi ıÝı Tszıýn.
Otyrys barysynda saıasattanýshylar byltyr aıaqtalǵan Qazaqstan tóraǵalyǵyna joǵary baǵa berip, barlyq baǵytta baılanystardy nyǵaıta túsýdiń mańyzyna toqtaldy.
— Uıymǵa múshe elderdiń ózara tıimdi dıalogy ShYU aıasyndaǵy yntymaqtastyqty joǵary deńgeıge shyǵardy. Bul rette Qazaqstan men Ózbekstannyń róli erekshe. Alǵashynda óńirlik qaýipsizdik máselelerin sheshýge baǵyttalǵan uıym búginde ekonomıkalyq damýǵa oıysyp jatyr. Máselen, memleketter azyq-túlik qaýipsizdigin qamtamasyz etý jáne kólik-logıstıkalyq jobalardy birlesip iske asyrýǵa múddeli. Sondyqtan ShYU-nyń áleýeti mol, — dedi ózbekstandyq saıasattanýshy Mýrat Bahadırov Kazinform tilshisiniń saýalyna jaýap bere otyryp.
Eske salaıyq, byltyr shildede Astanada ótken ShYU sammıti barysynda 25 qujatqa qol qoıyldy. Kóptegen álem elderi Qazaqstannyń uıymǵa tóraǵalyǵyn joǵary baǵalady. Elimizdiń bastamalary uıymnyń jumysyna serpin berdi.
Sonymen qatar, taıaýda Túrkııa ShYU-nyń tolyq múshesi atanýǵa nıetti ekenin málimdedi.