Qytaı sheteldikterdiń elge kirýin jeńildetpekshi
Qytaı sheteldikterdiń birqatar sanattary úshin elge kirý erejelerin jeńildetedi. Bul týraly Qytaıdyń kóshi-qon jónindegi memlekettik basqarmasynyń sheteldiktermen jumys departamentiniń dırektory Mao Sıýı málim etti, dep habarlaıdy Kazinform reseılik TASS agenttigine silteme jasap.
Qytaıǵa qysqa merzimdi qyzmetpen, atap aıtqanda, iskerlik yntymaqtastyq, kásipkerlikpen aınalysý, týystaryna barý, kórikti jerlerdi aralaý nemese jeke isterin júrgizý maqsatynda kelgen sheteldikter endi vızany uzartý, aýystyrý jáne qaıta rásimdeý týraly ótinishti turǵylyqty jerine jaqyn ımmıgratsııalyq ákimshilik organyna bere alady.
Sonymen qatar, port vızasyn alý úshin Qytaıǵa keletin sheteldikter úshin kirý sharttary jeńildetilip, elorda áýejaılary arqyly tranzıttik ótý tártibi jeńildetiledi. Beıjiń áýejaılarynda 24 saǵattan aspaıtyn merzimge tranzıtpen júretin sheteldikter shekaralyq baqylaý protsedýralarynan bosatylady jáne vıza qajet bolmaıdy.
Jańa erejeler Qytaıǵa qysqa merzimge týystarymen kezdesýge barýdy da jeńildetedi. Bul maqsatpen kiretin sheteldikterden shaqyrýshy tarappen qarym-qatynasyn rastaý jáne sáıkes aýtentıfıkatsııa protsedýralarynan ótý talap etilmeıdi. Onyń ornyna qabyldaýshy tarap bul týraly málimdeme usyna alady.
Mao Sıýı sonymen qatar, ımmıgratsııany basqarý salasyndaǵy aqparattyq tehnologııanyń jetildirilýine baılanysty ótinish berý protsesi burynǵysynan da jeńildeı túsetinin aıtty.
