Qytaı sheteldik týrıster úshin Tax Free júıesin jeńildetedi
ASTANA. KAZINFORM - Qytaıda sheteldik týrısterge arnalǵan salyqty qaıtarý (Tax Free) rásimin jeńildetetin jańa erejeler qabyldandy. Bul týraly Kazinform agenttiginiń Beıjińdegi menshikti tilshisi habarlady.
Qytaıdyń Saýda mınıstrligi ózge memlekettik organdarmen birlesip, sheteldik qonaqtarǵa arnalǵan salyqty qaıtarý júıesin ońtaılandyrý jóninde keshendi sharalar bekitti. Reformanyń maqsaty – ishki týrızmdi damytý jáne el ishindegi tutyný kólemin arttyrý.
Jańa josparǵa sáıkes, Tax Free júıesi bar dúkender jelisi aıtarlyqtaı keńeıtiledi. Mundaı núkteler iri saýda aımaqtarynda, týrıstik ortalyqtarda jáne kólik toraptarynda ashylady.
Quny 10 myń ıýannan tómen satyp alýlar úshin iriktemeli baqylaý júıesi engiziledi. Al osy somadan asatyn taýarlar burynǵydaı jeke tekserýden ótedi.
Sheteldik týrısterge arnalǵan jedel salyq qaıtarý qyzmeti endi óńiraralyq deńgeıde qoljetimdi bolady. Bul shetel azamattaryna Qytaıdyń kez kelgen provıntsııasyndaǵy ótkizý pýnktteri arqyly rásimdi aıaqtaýǵa múmkindik beredi.
Salyq qaıtarýdan keıin elden shyǵý merzimi 28 kúnge deıin biryńǵaı tártippen uzartylmaq.
2026 jyldyń shildesinen bastap barlyq rásimdeý protsesi tolyqtaı tsıfrlyq formatqa kóshedi. Keden organdary men ýákiletti agenttikter ótinishter men túbirtekterdi arnaıy onlaın platformalar arqyly rastaıdy.
Osyǵan deıin Qytaıda robottarǵa «tólqujat» berile bastaǵany týraly jazdyq.
