Qytaı sheteldik týrıster úshin tax free júıesin jeńildetedi
ASTANA. KAZINFORM — Qytaı bıligi sheteldik týrısterge arnalǵan tax free (elden shyǵar kezdegi QQS qaıtarý) júıesin odan ári jeńildetý týraly sheshim qabyldady, dep habarlady Lianhe Zaobao.
Eldiń Saýda mınıstrligi, Qarjy mınıstrligi jáne Memlekettik salyq basqarmasy birlesip jarııalaǵan jańa qujatqa sáıkes, shetel azamattary úshin qaıtarym rásimi yńǵaıly ári jyldam bolmaq.
Jańa erejelerge sáıkes, 2026 jylǵy 1 shildeden bastap Qytaıda «satyp alǵan sátte qaıtarý» («即买即退») júıesi boıynsha rásimdelgen taýarlardy elden shyǵarý merzimi barlyq óńirde biryńǵaı 28 kún bolyp belgilenedi. Buǵan deıin ár aımaqta talap ártúrli bolǵan.
Sonymen qatar, Qytaı bıligi óńiraralyq ózara taný júıesin engizbek. Bul sheteldik týrısterge bir qalada taýar satyp alyp, basqa áýejaı nemese shekara beketi arqyly elden shyqqanda da tax free rásimin aıaqtaýǵa múmkindik beredi.
Qujatta kórsetilgendeı, 2026 jyldan bastap tax free rásimi tolyqtaı tsıfrlandyrylyp, qaǵazsyz formatqa kóshiriledi. Keden organdary men operatorlar chek pen qujattardy onlaın túrde rastaýǵa múmkindik alady.
Sonymen birge baqylaý sharalary da saqtalady. Qaıtarylatyn soma 10 myń ıýannan tómen bolǵan jaǵdaıda keden taýarlardy irikteý tártibimen tekseredi. Al 10 myń ıýannan joǵary somalar boıynsha barlyq taýar mindetti túrde tekseriledi.
Qytaı bıligi bul ózgeristerdiń basty maqsaty — elge keletin sheteldik týrısterdiń saýda jasaýyn yntalandyrý ekenin atap ótti. Sońǵy jyldary Beıjiń týrıstik tutynýdy arttyrý maqsatynda vızalyq rejımdi jeńildetý, sheteldik kartalar men tólem júıelerin keńeıtý, sondaı-aq tax free rásimderin ońaılatý baǵytynda birqatar shara qabyldap keledi.
Eske sala keteıik, Qytaıda sheteldik týrıster bir kúnde bir dúkennen keminde 200 ıýan kóleminde saýda jasasa, tax free rásimdeýge quqyly. Al qolma-qol qaıtarym lımıti 20 myń ıýanǵa deıin ulǵaıtylǵan.
Buǵan deıin Qytaıdyń 2026 jylǵy sáýir aıynda syrtqy saýda aınalymy 14,2%-ǵa óskeni týraly jazǵanbyz.
