Qytaı sheteldik IT mamandaryna arnalǵan jańa «K vızasyn» iske qosty

ASTANA. KAZINFORM — Osy aptada Qytaıda tehnologııa salasyndaǵy sheteldik mamandardy tartýǵa baǵyttalǵan jańa vızalyq baǵdarlama iske qosylady, dep jazdy AZƏRTAC.

Bul qadam Beıjińniń geosaıası turǵydan Vashıngtonmen básekelestiktegi ustanymyn kúsheıtedi dep kútiledi. Sebebi AQSh-tyń jańa vızalyq saıasaty sheteldik úmitkerlerdi balama nusqalardy izdeýge ıtermelep otyr.

Qytaıda bilikti jergilikti ınjenerler jetispese de, bul baǵdarlama Beıjińniń sheteldik ınvestıtsııalar men talanttardy tartýǵa ashyq el retinde ózin kórsetýge umtylýynyń bir bóligi. Óıtkeni AQSh engizgen jańa kedendik baj salyqtaryna baılanysty artyp kele jatqan saýda shıelenisteri eldiń ekonomıkalyq bolashaǵyna teris áser etip otyr.

Reuters agenttigi Qytaıdyń sheteldik ınvestıtsııalar men týrızmdi yntalandyrý maqsatynda birqatar qadamdar jasaǵanyn jazady. Atap aıtqanda, sheteldik ınvestorlar úshin kóbirek sektorlar ashylyp, Eýropanyń kóptegen elderi, Japonııa, Ońtústik Koreıa jáne basqa elderdiń azamattary úshin vızasyz rejım engizildi.

Tamyz aıynda jarııalanǵan K vızasy — ǵylym, tehnologııa, ınjenerııa jáne matematıka (STEM) salalaryndaǵy jas sheteldik ýnıversıtet túlekterine arnalǵan. Bul vıza sheteldikterge jumys berýshiniń shaqyrýynsyz Qytaıǵa kelýge, turýǵa jáne jumys isteýge múmkindik berýdi ýáde etedi. Bul, ásirese, AQSh-ta jumys isteýge shekteý qoıylǵan adamdar úshin balama retinde qyzyqty bolýy múmkin.

Buǵan deıin, osy aıda Donald Tramp ákimshiligi kompanııalardan sheteldik joǵary bilikti mamandardy jaldaýǵa keńinen qoldanylatyn H-1B jumys vızasy úshin jylyna 100 myń AQSh dollary kóleminde tólem jasaýdy talap etetinin málimdedi.

Ońtústik Koreıa, Germanııa jáne Jańa Zelandııa sııaqty basqa elder de sheteldik bilikti mamandardy tartý úshin vızalyq erejelerdi jeńildetip otyr. 

Immıgratsııa salasynyń sarapshylarynyń aıtýynsha, K vızasynyń basty artyqshylyǵy — jumys berýshiniń demeýshiligi talap etilmeıdi. Bul — H-1B vızasyn alý jolyndaǵy negizgi kedergilerdiń biri bolyp kelgen.

Alaıda, ýádelerine qaramastan, K vızasyna qatysty keıbir qıyndyqtar bar. Qytaı úkimetiniń usynymdarynda «jas mólsheri, bilimi jáne jumys tájirıbesi» boıynsha talaptar naqty kórsetilmegen. Sondaı-aq, qarjylyq yntalandyrý, jumysqa ornalastyrýǵa kómektesý, turaqty turý nemese otbasyn shaqyrý sııaqty máseleler boıynsha aqparat berilmegen. AQSh-tan aıyrmashylyǵy, Qytaı shetel azamattaryna azamattyqty tek óte sırek jaǵdaılarda ǵana beredi.

Taǵy bir eleýli kedergi — til máselesi: Qytaıdaǵy tehnologııalyq kompanııalardyń kópshiligi qytaı tilinde jumys isteıdi, bul qytaı tilin bilmeıtin sheteldikterdiń múmkindigin shekteıdi.

Aıta keteıik, Qytaıda eki jańa dúnıejúzilik bıosferalyq qoryq tirkeldi.