Qytaı «Shenchjoý-23» ǵarysh kemesi orbıtalyq stantsııamen túıisti
ASTANA. KAZINFORM – Qytaıdyń «Shenchjoý-23» basqarylatyn ǵarysh kemesi «Tıangýn» ulttyq orbıtalyq stantsııasynyń negizgi modýlimen sátti túıisti, dep habarlaıdy Kazinform agenttiginiń Beıjińdegi menshikti tilshisi.
QHR basqarylatyn ǵaryshtyq ushýlar basqarmasynyń (CMSA) málimetinshe, túıisý dúısenbi kúni Beıjiń ýaqytymen tańǵy saǵat 2:45-te tirkeldi. Jaqyndaý jáne ornyǵýdyń búkil protsesi shamamen 3,5 saǵatqa sozyldy.
Stantsııa bortynda ornalasqan «Shenchjoý-21» ekıpajy lıýkterdi tańǵy saǵat 5:13-te ashty. Kelip jetken áriptesterimen amandasqannan keıin ǵaryshkerler orbıtadaǵy aınalymyn oryndaýǵa kiristi.
Jaqyn arada nysanda bir ýaqytta alty adamnyń ómir tirshiligin qamtamasyz etý bastalady. Bul aınalym Qytaıdyń ǵaryshqa basqarylatyn ushý baǵdarlamasy tarıhyndaǵy segizinshi «ǵaryshtyq kezdesý» boldy.
Eske salsaq, «Shenchjoý-23» mıssııasy barysynda ekıpaj ǵarysh bıologııasy, materıaltaný, mıkrogravıtatsııa, aeroǵarysh medıtsınasy jáne jańa tehnologııalar salalarynda 100-den astam ǵylymı jáne qoldanbaly jobany júzege asyrady.
Ǵaryshkerler ǵaryshtaǵy embrıondyq damýdy zertteý úshin danıo-rerıo balyǵynyń embrıondaryna, tyshqandarǵa jáne baǵanaly jasýshalar negizindegi «jasandy embrıondarǵa» tájirıbeler júrgizedi. Sondaı-aq jańa sırekjer magnıtteri men jeńil joǵary entropııalyq qorytpalar jasaý josparlanyp otyr.
Qytaı ǵaryshkerleriniń biriniń bir jyldyq mıssııasy adamnyń orbıtada uzaq ýaqyt bolýǵa beıimdelýin zertteýge baǵyttalǵan. Ekıpaj jańa ǵarysh akkýmýlıator batareıasyn synaqtan ótkizip, ashyq ǵaryshqa shyǵyp, syrtqy jabdyqtarmen operatsııalar júrgizedi.
Osyǵan deıin Qytaı «Shenchjoý-23» ǵarysh kemesin ushyrǵanyn habarladyq.
