Qytaı zaqymdalǵan ǵarysh kemesiniń ekıpajyn Jerge qaıtarýǵa daıyndalyp jatyr

ASTANA. KAZINFORM — Qytaı «Shenchjoý-20» ǵarysh kemesiniń ekıpajyn Jerge qaıtarý jumystaryna kiristi, dep habarlaıdy Anadolý agenttigi.

Qytaıdyń CMSA agenttiginiń habarlaýynsha, daıyndyq josparǵa saı jáne bekitilgen keste boıynsha júrgizilip keledi.

Agenttik málimetinshe, kemede zaqym anyqtalǵannan keıin tótenshe jaǵdaı hattamalary iske qosylyp, «Shenchjoý-20» apparatynyń qaýipsizdigin tekserý jáne taldaý jumystary júrgizilgen. Bul sharalar ekıpajdyń Jerge qaýipsiz oralý múmkindigin anyqtaý úshin qolǵa alynǵan. Degenmen málimdemede ekıpajdyń naqty qashan oralatyny kórsetilmegen.

South China Morning Post basylymynyń habarlaýynsha, CMSA-degi derekkózder qytaılyq ǵaryshkerlerdi qaıtarý úshin jańa ǵarysh kemesin ushyrý múmkin ekenin aıtqan.

Áńgime bastapqyda kelesi ekıpajdy ǵarysh stantsııasyna jetkizýge arnalǵan «Shenchjoý-22» kemesi týraly bolyp otyr. Ol qazir Qytaıdyń soltústik-batysyndaǵy Tszıýtsıýan ǵarysh aılaǵynda daıyn tur.

Úsh taıkonavtyń Jerge oralýy 5 qarashaǵa josparlanǵan edi, alaıda «Shenchjoý-20» kemesindegi zaqymǵa baılanysty mıssııa keıinge qaldyryldy. Aldyn ala málimet boıynsha, zaqym ǵaryshtyq qaldyqtarmen soqtyǵysý saldarynan bolǵan.

«Shenchjoý-20» ekıpajy 24 sáýirde orbıtaǵa ushyrylyp, ǵaryshta alty aıdan astam ýaqyt ótkizdi. 31 qazanda olar orbıtada «Shenchjoý-21» jańa ekıpajymen vahta aýystyrý rásimin ótkizgen.

Qazirgi ýaqytta Qytaıdyń «Tıangýn» ǵarysh stantsııasynda únemi úsh qytaılyq ǵaryshker jumys isteıdi. Ekıpajdar ár alty aı saıyn aýysyp otyrady.

Aıta keteıik, Qytaı alǵashqy ǵaryshtyq týrızm jobasyn tanystyratynyn jazdyq. Sondaı-aq Qytaı tómen orbıtaly jerserikter tobyn ushyrǵanyn habarlaǵanbyz.