Qytaı segiz memlekettik qarjy kompanııasyna 360 mıllıard ıýan kapıtal quımaq
ASTANA. KAZINFORM — Qytaı qarjy júıesiniń áleýetin nyǵaıtý jáne ekonomıkalyq ósim baıaýlaǵan tusta nesıe berý múmkindigin saqtap qalý maqsatynda memlekettik segiz qarjy kompanııasyna 360 mlrd ıýan kóleminde kapıtal quıýdy josparlap otyr.
Sınhýa agenttiginiń habarlaýynsha, qoldaý kórsetiletin segiz qarjy kompanııasynyń qatarynda eki memlekettik kommertsııalyq bank, eki saıasattyq qarjy ınstıtýty jáne tórt memlekettik kommertsııalyq saqtandyrý kompanııasy bar.
Jalpy somanyń 300 mlrd ıýani Qytaı Qarjy mınıstrligi shyǵarǵan arnaıy memlekettik oblıgatsııalar esebinen, al 60 mlrd ıýani Qytaı ulttyq temeki korporatsııasy men oǵan qarasty enshiles kompanııalar esebinen qarjylandyrylady.
Onyń ishinde Qytaıdyń Ónerkásiptik-kommertsııalyq banki men Qytaıdyń Aýyl sharýashylyǵy banki Qarjy mınıstrligine, Qytaı ulttyq temeki korporatsııasyna jáne onyń enshiles kompanııalaryna maqsatty túrde A sanatyndaǵy aktsııalar shyǵaryp, tıisinshe 100 mlrd jáne 160 mlrd ıýannan aspaıtyn qarajat tartýdy josparlap otyr. Qytaıdyń Eksport-ımport bankine jáne Qytaıdyń Eksporttyq kredıtterdi saqtandyrý korporatsııasyna Qarjy mınıstrligi tıisinshe 30 mlrd jáne 10 mlrd ıýan kóleminde tikeleı kapıtal bóledi.
Qytaıdyń Halyq saqtandyrý kompanııasy (PICC) Qarjy mınıstrligine A sanatyndaǵy aktsııalar shyǵarý arqyly 15 mlrd ıýan tartýdy josparlap otyr. Al Qytaı Ómir saqtandyrý toby men Qytaı Taıpın saqtandyrý kompanııasyna tıisinshe 35 mlrd jáne 7 mlrd ıýan kóleminde tikeleı kapıtal quıylady. Qytaı qaıta saqtandyrý kompanııasy Qarjy mınıstrliginiń ishki naryqtaǵy aktsııalardy qolma-qol qarajatqa satyp alýy arqyly 3 mlrd ıýan tartýdy josparlap otyr.
Qytaı Qarjy mınıstrligi byltyr da «ortalyq qarjy ınstıtýttaryn kapıtaldandyrýǵa arnalǵan arnaıy memlekettik oblıgatsııalar» arqyly eldegi tórt iri memlekettik bankke 500 mlrd ıýan quıǵan edi. Al bul joly qarjylyq qoldaý kórsetiletin qarjy ınstıtýttarynyń qatary keńeıip otyr.
Qytaı Qarjy mınıstrliginiń málimetinshe, atalǵan segiz kompanııanyń qyzmeti ornyqty, aktıvteriniń sapasy qanaǵattanarlyq, negizgi retteýshilik kórsetkishteri de turaqty.
Sıngapýrlyq Lianhe Zaobao basylymynyń taldaýynsha, qazirgi tańda Qytaıdyń qarjy ınstıtýttarynda kapıtal qory aıtarlyqtaı jetkilikti, al Beıjińniń bul jolǵy kapıtaldy tolyqtyrý jospary bankterge kásiporyndar men úı sharýashylyqtaryn nesıeleýdi keńeıtýge múmkindik berýdi kózdeıdi.
Basylymnyń jazýynsha, úkimet shyǵyndaryn arttyrý nemese aqsha-nesıe saıasatyn jumsartý sharalaryna arqa súıeýdiń ornyna, Beıjiń óziniń qarjy júıesine yqpal etý múmkindigin paıdalanyp, qarajatty kásiporyndarǵa, úı sharýashylyqtaryna jáne ekonomıkanyń basqa salalaryna jetkizetin qarjy ınstıtýttarynyń balanstaryn nyǵaıtýdy kózdeıdi.
Hýaıan baǵaly qaǵazdar kompanııasynyń sarapshysy Lıao Chjımınniń aıtýynsha, iri memlekettik qarjy ınstıtýttarynyń kapıtalyn tolyqtyrý — sońǵy eki jylda josparlanǵan sharalardyń qataryna jatady. Onyń negizgi maqsaty — «bankterdiń retteýshilik talaptardy oryndaýǵa jáne naqty ekonomıkany qoldaýǵa jetkilikti múmkindigi bolýyn qamtamasyz etý».
Basylymnyń jazýynsha, Qytaı bankteriniń taza paıyzdyq marjasy tarıhı eń tómen deńgeıge deıin tómendedi. Bul bankterdiń tabystylyǵy birtindep álsirep kele jatqanyn kórsetedi. Osyndaı jaǵdaıda memlekettik kapıtaldyń tolyqtyrylýy bankterge úkimettiń negizgi saıası basymdyqtaryn qarjylandyrýdy jalǵastyryp, strategııalyq salalarǵa, ınfraqurylymǵa jáne jeke kásiporyndarǵa nesıe berý múmkindigin keńeıtýge jaǵdaı jasaıdy.
Sonymen qatar saqtandyrý kompanııalaryna kapıtal quıý olardyń tólem qabiletin arttyryp, qarajattyń naqty ekonomıkaǵa ınvestıtsııalaý múmkindigin keńeıtedi. Sarapshylardyń pikirinshe, bul saqtandyrý kompanııalarynyń qarajatyn qor naryǵyna baǵyttaýǵa, sol arqyly kapıtal naryǵyna qoldaý kórsetýge tıimdi.
Buǵan deıin AQSh pen Qytaıdyń qyrkúıek aıynyń ortasynda jasandy ıntellekt qaýipsizdigine arnalǵan alǵashqy resmı kelissózderdi ótkizýdi josparlap otyrǵanyn jazǵan edik.
