Qytaı Saýda mınıstrligi: AQSh-tyń «ózara tarıfter» engizýine qarsymyz
ASTANA. KAZINFORM — AQSh prezıdenti Donald Tramp búgin saýda seriktesterine «ózara tarıfter» engizdi. Osyǵan baılanysty Qytaıdan AQSh-qa eksporttalatyn taýarlarǵa salynatyn jalpy tarıf keminde 54%-ǵa jetti.
Qytaıdyń Saýda mınıstrligi bul sheshimge qatań qarsylyq bildirip, óz múddesin qorǵaý úshin qajetti qarymta sharalar qabyldaıtynyn málimdedi.
Qytaı Saýda mınıstrliginiń saıtynda jarııalanǵan málimdemege sáıkes, 4 sáýir kúni vedomstvonyń resmı ókili AQSh-tyń halyqaralyq saýdada «ádiletsizdikke tap boldyq» degen jeleýmen barlyq saýda seriktesine joǵary tarıf engizgenin synǵa aldy. Onyń aıtýynsha, bul sheshim kópjyldyq kópjaqty saýda kelissózderi arqyly qol jetkizilgen múddeler teńgerimin elemeı, naǵyz shyndyqty — AQSh-tyń halyqaralyq saýdadan orasan zor paıda taýyp kele jatqanyn joqqa shyǵarady.
Resmı ókildiń málimdeýinshe, AQSh-tyń «ózara tarıf» tujyrymdamasy sýbektıvti jáne birjaqty baǵalaýǵa negizdelgen, bul halyqaralyq saýda erejelerine qaıshy jáne múddeli taraptardyń zańdy quqyqtaryn óreskel túrde buzady. Ol mundaı áreketti «birjaqty álimjettik» dep sıpattap, AQSh-tyń kóptegen saýda áriptesiniń buǵan qatań narazylyq bildirip, ashyq qarsylyq tanytyp otyrǵanyn aıtty.
Resmı ókildiń aıtýynsha, tarıfterdi kóterý AQSh-tyń ishki máselesin sheshe almaıtynyn, kerisinshe, eldiń ulttyq múddesine zııanyn tıgizip, jahandyq ekonomıkalyq damý men óndirý-jetkizý tizbeginiń turaqtylyǵyna qaýip tóndiretinin tarıh san márte dáleldegen. Onyń sózinshe, saýda soǵysynda jeńimpaz bolmaıdy, al protektsıonızm tek tyǵyryqqa tireıdi. Ol AQSh-ty birjaqty tarıftik sharalardan dereý bas tartýǵa jáne alaýyzdyqtardy sheshý úshin saýda seriktesterimen teń quqyly dıalog qurýǵa shaqyrdy.
Tramptyń jańa tarıf saıasatyna sáıkes, AQSh Qytaıdan ákelinetin taýarlarǵa qosymsha 34% baj salyǵyn engizedi. Oǵan jyl basynda kúshine engen 20% tarıfti qosqanda, Qytaı taýarlary úshin jalpy tarıf mólsheri keminde 54%-ǵa deıin kóterilip otyr.
Osyǵan deıin Prezıdent Donald Tramp AQSh-tyń barlyq saýda seriktesi úshin 10% tarıfti jáne óziniń «Amerıka birinshi kezekte» atty baǵdarlamasy aıasynda ózge ondaǵan memleketke joǵary baj salyǵyn engizýdi qarastyratyn, barlyq salany qamtıtyn paketin usynǵanyn jazǵan edik.