Qytaı sapary: Nuralhan Kósherov bastaǵan túrkistandyq delegatsııa iri zaýyttarda boldy
LINЬI. KAZINFORM – Túrkistan oblysynyń ákimi Nuralhan Kósherov bastaǵan resmı jáne iskerlik delegatsııa Qytaı Halyq Respýblıkasyna jumys sapary aıasynda Shandýn provıntsııasyndaǵy Lını qalasynda ornalasqan birqatar iri kásiporynnyń jumysymen tanysty.
Delegatsııa aýyl sharýashylyǵy tehnıkasyn óndiretin «Shandong Huasheng Zhongtian» zaýytymen, elektr jelilerine arnalǵan metall tirekterdi shyǵaratyn kásiporyn jáne kóshe jaryǵyn qamtamasyz etetin jabdyqtar óndirisimen de tanysty. Barlyq óndiristik oryndar zamanaýı tehnologııalarmen jabdyqtalǵan jáne ónimderin syrtqy naryqqa eksporttaıdy.
Kompanııa joǵary berik ári uzaq merzimdilikke negizdelgen metall tirekterdi óndiredi. Bul elektr jelileri men qoǵamdyq jaryqtandyrý sektorlarynda qoldanylady. Kóshelerge arnalyp arnaıy LED shamdar men tolyq jaryq júıeleri shyǵarylady, qalalar men ónerkásiptik aımaqtardy jaryqtandyrýǵa qoldanylady.
Kún sáýlesiniń jaryqdıodty shamdary – kún sáýlesin elektr energııasyna túrlendiredi, ekologııalyq taza.
Oblys ákimi Túrkistan oblysynda jańadan salynyp jatqan zaýyt, fabrıkalarǵa yńǵaıly jaryqtandyrý quraldaryn keńinen paıdalaný joldaryn qarastyrýdy quptap, jaýapty basshylarǵa tıisti tapsyrma berdi.
Túrkistan oblysynda jergilikti ınfraqurylymdy jańǵyrtý boıynsha da júıeli jumystar júrgizilip jatyr. Byltyr óńirde 21 myńnan astam kóshe shamy ornatylyp, onyń 14 myńǵa jýyǵy bıýdjet esebinen, qalǵany demeýshilik esebinen iske asyryldy. Bıyl qosymsha 7 522 kóshe shamyn ornatý josparlanǵan. Sheteldik jańa tehnologııany óńirde qoldaný joldary qarastyrylady.
Sondaı-aq oblys ákimi bastaǵan resmı jáne iskerlik delegatsııa aýyl sharýashylyǵy tehnıkasy kórme ortalyǵyna da baryp, ámbebap benzın qozǵaltqyshtary, baý-baqsha, saıabaq jáne orman sharýashylyǵy tehnıkalarynyń sońǵy úlgilerin kórdi.
Sapar qorytyndysy boıynsha taraptar ınvestıtsııalyq yntymaqtastyqty keńeıtý, jańa óndirister ashý, tehnologııa transferi jáne kadrlar daıarlaý máseleleri boıynsha naqty usynystarmen almasyp, kelissózder júrgizdi.
Túrkistan oblysy ákimdigi sheteldik seriktestermen tyǵyz baılanys ornatyp, óńirge ınvestıtsııa tartý jáne jańa óndiristerdi iske qosý arqyly halyqtyń ál-aýqatyn arttyrýdy basty maqsat retinde qoıyp otyr.
Sapar barysynda delegatsııa álemge tanymal «Shandong Kamoya Smart Culture and Tourism Technology Co., Ltd.» kompanııasynyń zaýytyttaryna baryp, smart kapsýlaly úıler, tasymaldanatyn modýldik qurylymdar jáne zamanaýı týrıstik ınfraqurylym nysandarynyń óndirisimen tanysty. Kompanııa men BNK GROUP LTD JShS arasynda kapsýlaly úılerdi qurastyrý boıynsha birlesken joba bastalyp ketti. Aldaǵy ýaqytta bul úıler Túrkistanda «KHAN TAU» brendimen óndiriletin bolady. Qazirgi tańda alǵashqy daıyn ónim Túrkistan óńirine jóneltýge ázir.