Qytaı Rýbıony sanktsııadan bosata ma?

ASTANA. KAZINFORM – Qytaı Syrtqy ister mınıstrliginiń resmı ókili Go Tszıakýn seısenbi kúni AQSh-nyń jańa Memlekettik hatshysy Marko Rýbıony sanktsııadan bosatý múmkindigi týraly pikir bildirdi.

Bul týraly sıngapýrlyq Lianhe Zaobao basylymy jazdy. 

Kezekti baspasóz maslıhatynda tilshilerdiń biri «Rýbıo Tramp úkimetiniń Memlekettik hatshysy qyzmetine kiriskenin rastady. Qytaı úkimeti 2020 jyly Rýbıoǵa sanktsııa salǵan bolatyn. Bul jaǵdaıdyń Qytaı-AQSh qarym-qatynasynyń damýyna qıyndyq týdyrýy jáne tosqaýyl jasaýy múmkin ekenin eskere otyryp, Qytaı tarapy Rýbıoǵa qatysty sanktsııanyń kúshin joıýdy qarastyrýy múmkin be?» dep surady. 

Go Tszıakýn bul suraqqa tike jaýap qaıtarmaı, Qytaı men AQSh-tyń joǵary laýazymdy tulǵalary arasyndaǵy baılanysty saqtaýyń qajettiligi týraly ǵana aıtty.

— Qytaı óziniń ulttyq múddelerin tabandy túrde qorǵaıdy, sonymen qatar Qytaı men AQSh-tyń joǵary laýazymdy tulǵalary tıisti tásildermen ózara baılanysty saqtaýy qajet, — dedi resmı ókil.

Qytaı tarapy «Qytaıǵa qarsy aıǵaıshy» dep ataǵan Marko Rýbıo 20 qańtar kúni resmı túrde AQSh Memlekettik hatshysy qyzmetine taǵaıyndaldy.

Rýbıo adam quqyqtaryna qatysty máseleler boıynsha Shyńjań men Gonkongtaǵy jaǵdaıǵa syn aıtqany úshin 2020 jyly eki márte Beıjińniń sanktsııasyna ushyraǵan bolatyn. 

Buǵan deıin QHR tóraǵasynyń orynbasary Qytaıdyń AQSh-pen jumys isteýge daıyn ekenin bildirgen.