Qytaı robottary kórmeden shyǵyp, jumysqa kiristi
ASTANA. KAZINFORM – Qytaıda gýmanoıd robottar kórmelerdegi demonstratsııalyq kórsetilimderden naqty jumys oryndaryna belsendi engizile bastady. Robottardy óndiriste jumys isteýge úıretýge baǵyttalǵan tutas jańa ındýstrııa qalyptasyp keledi, dep habarlaıdy Xinhua.
Beıjińde ótken Qytaı halyqaralyq qyzmet kórsetý saýda jármeńkesinde (CIFTIS) bıylǵy kóktem merekesine arnalǵan teleshoýda kıim jınaǵan Galbot G1 roboty qyzmetkerleri joq dúńgirshekte jumys istedi. Mundaı avtomattandyrylǵan saýda oryndary Beıjińdegi Jazǵy saraı sııaqty týrıstik nysandarda da jumys isteıdi. Al osy úlgidegi alǵashqy sheteldik dúńgirshek 1 qyrkúıekte Gonkongte ashyldy.
Kórmede robottar poshta qyzmetkeri, quımaq daıyndaýshy jáne barısta retinde de kórsetildi. Olar ashyqhattarǵa mór basyp, taýar jetkizip, quımaq pisirip, kofe daıyndaıdy.
Alaıda robottardy naqty óndiris jaǵdaıynda qoldanýǵa kedergi keltiretin negizgi másele – olardy oqytýǵa qajetti derektiń tapshylyǵy. Shijingshan Embodied Intelligence Training Center basshysy Chjý Kaıdyń aıtýynsha, Qytaıda bıylǵy birinshi jartyjyldyqta 23 myń gýmanoıd robot satylǵanymen, olardyń 5%-dan azy ǵana naqty óndiristik jelilerde turaqty jumys istep júr.
Osy máseleni sheshý úshin Beıjińdegi ortalyqta robottarǵa arnalǵan «kásiptik mektep» jumys isteıdi. Munda shamamen 270 robot turmystyq jumystardy, kútim kórsetý jáne óndiristik tapsyrmalardy oryndap úırenedi. Ortalyq jylyna 20 mln-ǵa jýyq sapaly derek jınaıdy.
9 qyrkúıekte Qytaı «embodıment ıntellekt robottaryn qoldaný jónindegi tehnık» atty jańa kásipti resmı túrde moıyndady. Onyń quramyna robottarǵa arnalǵan derek jınaýshy jáne robot jattyqtyrýshy mamandyqtary engizildi.
Robottardy oqytýǵa qajetti tehnologııalar da damyp keledi. Arnaıy qurylǵylar adamnyń qımyl-qozǵalysyn, qoldyń kúshin jáne zatty ustaý erekshelikterin jazyp, keıin bul derekterdi robottardy úıretýge paıdalanady.
Derekterdiń ózi de jańa taýarǵa aınalyp otyr. CIFTIS aıasynda Qytaı embodıment ıntellekt salasyndaǵy derekterdi halyqaralyq deńgeıde usynýǵa baǵyttalǵan alǵashqy ónerkásiptik platformasyn iske qosty. Beıjińniń Shıtszınshan aýdanynda joǵary sapaly derekter jıyntyqtary jasalyp, júzdegen derek ónimderi naryqqa shyǵarylǵan.
Qytaı robottary shetelde de jumys isteı bastady. Beıjińdik Anyverse Dynamics kompanııasy Envision jasyl tehnologııalar tobymen 500 mln ıýanǵa (shamamen 74,7 mln dollar) kelisim jasady. Kompanııanyń K15 jartylaı gýmanoıd robottarynyń alǵashqy partııasy osy aıda Frantsııadaǵy akkýmýlıator zaýytyna jetkizilip, júk tıeý jáne túsirý jumystaryn avtonomdy atqara bastady.
Mamandardyń pikirinshe, bolashaqta robottardyń ózinen bólek, olardy oqytýǵa arnalǵan derekter men qyzmetter Qytaıdyń qyzmet kórsetý saýdasynyń mańyzdy bóligine aınalýy múmkin.
Kórmede joǵary sekiretin, tamaq daıyndaıtyn, qabyrǵaǵa órmeleıtin robottar jáne basqa da 30-dan astam jańa ónim tanystyryldy.
Aıta keteıik, jýyrda ShQO-da robot-ıtter polıtsııanyń jańa «áriptesteri» retinde patrýlge shyqqanyn jazdyq.
Sondaı-aq adamǵa uqsaıtyn robottar Beıjiń oıyndarynda jańa rekord ornatty.
