Qytaı, Reseı jáne Iran Ońtústik Afrıka sýlarynda áskerı-teńiz jattyǵýlaryn bastady
ASTANA. KAZINFORM — Qytaı, Reseı jáne Iran Ońtústik Afrıka Respýblıkasynyń aýmaqtyq sýlarynda bir aptaǵa sozylatyn birlesken áskerı-teńiz jattyǵýlaryn bastady, dep habarlaıdy Reuters.
Qabyldaýshy tarap bul jattyǵýlardy «BRIKS +» operatsııasy retinde sıpattap, onyń maqsaty teńizdegi keme qatynasy men teńiz ekonomıkasynyń qaýipsizdigin qamtamasyz etý ekenin málimdedi.
«BRIKS +» — bastapqyda Brazılııa, Reseı, Úndistan, Qytaı jáne Ońtústik Afrıkany biriktirgen geosaıası bloktyń keńeıtilgen nusqasy. Qatysýshy elder bul birlestikti AQSh pen Batystyń ekonomıkalyq ústemdigine balama kúsh retinde qarastyrady. Qazirgi ýaqytta topqa taǵy alty memleket qosylǵan.
Ońtústik Afrıka Qytaı jáne Reseımen áskerı-teńiz jattyǵýlaryn turaqty túrde ótkizip keledi. Alaıda bul jolǵy manevrler AQSh prezıdenti Donald Tramp ákimshiligi men «BRIKS +» elderi, sonyń ishinde Qytaı, Iran, Ońtústik Afrıka jáne Brazılııa arasyndaǵy shıelenis kúsheıgen kezeńde ótip jatyr.
Qazirgi tańda keńeıtilgen BRIKS quramyna Mysyr, Indonezııa, Saýd Arabııasy, Efıopııa jáne Birikken Arab Ámirlikteri kiredi.
Jattyǵýlardyń ashylý rásimin Qytaı qarýly kúshteriniń ókilderi júrgizdi. Olardyń málimetinshe, Brazılııa, Mysyr jáne Efıopııa jattyǵýlarǵa baqylaýshy retinde qatysyp otyr.
Ońtústik Afrıka Qarýly kúshteriniń málimdemesinde WILL FOR PEACE 2026 jattyǵýlaryna BRIKS+ elderiniń áskerı-teńiz kúshteri qatysyp, teńiz qaýipsizdigin qamtamasyz etýge baǵyttalǵan birlesken operatsııalar men jedel úılesimdilik daǵdylaryn pysyqtaıtyny aıtylǵan.
Birikken operatsııalar jónindegi baspasóz hatshysynyń mindetin atqarýshy podpolkovnık Mfo Matebýla barlyq qatysýshylardyń jattyǵýǵa shaqyrylǵanyn habarlady.
Buǵan deıin AQSh prezıdenti Donald Tramp BRIKS elderin «antıamerıkalyq saıasat júrgizip otyr» dep aıyptap, byltyr qańtarda blokqa múshe barlyq memleketke qosymsha 10 paıyzdyq saýda bajyn engizemin dep qorqytqan bolatyn.
Ońtústik Afrıka prezıdenti Sırıl Ramafosa koalıtsııasyndaǵy ekinshi iri partııa — batysshyl Demokratııalyq alıans bul jattyǵýlardy eldiń jarııalanǵan beıtarap ustanymyna qaıshy dep baǵalap, BRIKS Ońtústik Afrıkany «geosaıası oıyndardyń quralyna aınaldyrdy» dep málimdedi.
Matebýla bul synǵa jaýap retinde jattyǵýlardyń saıası sıpatta emes ekenin, AQSh-qa qarsy baǵyttalmaǵanyn atap ótti. Onyń aıtýynsha, Ońtústik Afrıka AQSh áskerı-teńiz kúshterimen de mezgil-mezgil birlesken jattyǵýlar ótkizedi.
— Bul — áskerı-teńiz jattyǵýlary. Negizgi maqsat — múmkindikterimizdi arttyrý jáne aqparat almasý, — dedi ol.
Aıta keteıik, NATO Nıderlandyda ıadrolyq jattyǵýlaryn bastaǵany habarlandy.