Qytaı, Reseı, Qatar: SQO-da sheteldik ınvestorlar qandaı joba bastady

ASTANA. KAZINFORM — Soltústik Qazaqstan oblysynyń ákimi Ǵaýez Nurmuhambetov óńirde iske asyrylyp jatqan iri sheteldik jobalar týraly aıtyp berdi.

Onyń aıtýynsha, búginde SQO-da birqatar iri kompanııa jumys istep jatyr:
- Qatarlyq «Ýltradekor» kompanııasy DSP jáne LDSP plıtalaryn óndiretin zaýyttyń qurylysyn bastady. Investıtsııa kólemi 90 mlrd teńgeden asady. Joba óńirdegi aǵash óńdeý jáne jıhaz klasterin damytýdyń jańa draıverine aınalady.

- Reseılik «Beıkerton» kondıterlik ónimder óndirisin iske qosyp jatyr. Oǵan 37,3 mlrd teńge ınvestıtsııa salynǵan jáne 380 turaqty jumys ornyn qurý josparlanǵan.
- Qytaılyq «QILU Agro» traktorlar, tirkemeli jáne aspaly aýyl sharýashylyǵy tehnıkasyn óndirý boıynsha qurylys-montaj jumystaryn júrgizip jatyr.
- Reseılik «Ýralkran» kompanııasy jylyna 100 danaǵa deıin krandar men júk kótergish jabdyqtar shyǵaratyn zaýyt salyp jatyr, bul jergilikti naryq qajettiligin tolyq qamtamasyz etedi.

Sonymen qatar, oblys ákimi otandyq kompanııalar da nazardan tys qalmaıtynyn atap ótti. Jergilikti ınvestorlar da óńirde jobalardy belsendi iske asyryp, oblys ekonomıkasyna eleýli úles qosyp otyr.

— Óńirdegi ınvestıtsııa tartýdyń negizgi ortalyǵy – «Qyzyljar» arnaıy ekonomıkalyq aımaǵy. Búgingi tańda 22 qatysýshy tirkelgen, jalpy ınvestıtsııalar kólemi 317 mlrd teńgeden asady, onda shamamen 4 myń turaqty jumys orny qurylady, – dedi Ǵ. Nurmuhambetov.

Olardyń ishinde 28,4 mlrd teńgege bes joba iske qosylyp, shamamen 700 jumys orny ashyldy. Taǵy 17 joba iske asyrylý kezeńinde tur. Qatysýshylar qatarynda Túrkııa, Italııa, Qytaı, Germanııa, Qatar, Reseı jáne Qazaqstan ınvestorlary bar.

Aıta keteıik, Soltústik Qazaqstan oblysy 900 mlrd teńgege jýyq ınvestıtsııa tartty.

Sondaı-aq, SQO sharýalary el boıynsha súttiń 70% óndire alady.