Qytaı Reseı azamattary úshin bir jylǵa vızasyz rejım engizedi
MÁSKEÝ. KAZINFORM — 15 qyrkúıekten bastap Beıjiń Qytaıǵa sheteldik pasporttary bar Reseı azamattaryna 30 kúndik vızasyz rejım engizedi, dep habarlaıdy agenttik tilshisi.
Bul týraly QHR Syrtqy ister mınıstrliginiń resmı ókili Go Tszıachýn málimdedi.
Qytaı bıligi vızasyz kirýge quqyǵy bar elderdiń sanyn kóbeıtedi jáne osy arqyly eki jaqty saparlardy damytýǵa yqpal etedi. Reseı azamattaryna arnalǵan bul rejım 2025 jylǵy 15 qyrkúıekten 2026 jylǵy 14 qyrkúıekke deıin testilik rejımde engiziledi.
Naýryzda Máskeý men Pekın bul sharalardy talqylaǵan bolatyn. Tamyz aıynda Reseı SІM-de eki adamnan turatyn týrıstik toptar úshin vızasyz rejım boıynsha kelissózder júrgizilip jatqanyn habarlady.
Reseı azamattary Qytaıǵa barý úshin ádette vıza qajet. Biraq keıbir erekshelikter bar. Reseı azamattaryna Gonkongqa 14 kúnge deıin, Makao men Haınan aralyna 30 kúnge deıin vızasyz kirýge ruqsat etilgen. Qalǵan Qytaı aımaqtaryna barýǵa vıza alý qajet.
2023 jylǵy 10 qarashadan bastap Qazaqstan men Qytaı arasynda ózara vızasyz rejım jumys isteıdi.
Odan buryn Qytaı 75 eldiń azamattary úshin vızasyz rejım engizgenin jazǵanbyz.