Qytaı polıarlyq aımaqtardy spýtnık arqyly baılanystyrdy
ASTANA. KAZINFORM — Qytaı ǵalymdary Arktıkada ulttyq spýtnıktik ınternet júıesin synaqtan sátti ótkizdi. Joba aıasynda Soltústik Muzdy muhıt, Antarktıda jáne Tsınhaı-Tıbet taýly qyraty arasynda spýtnıktik baılanys ornatyldy, dep habarlaıdy Kazinform agenttiginiń Beıjińdegi menshikti tilshisi jergilikti BAQ-qa silteme jasap.
Synaq Qytaıdyń 16-shy Arktıkalyq ekspedıtsııasy aıasynda «Tszıdı» polıarlyq muzjarǵysh kemesiniń bortynda ótti. Mamandar jumys barysynda jalpy kólemi 100 GB-tan asatyn 300-den astam faıl jiberip, 40-tan astam beınekonferentsııa ótkizdi.
Ekspedıtsııa barysynda ǵalymdar Qytaıda jasalǵan muhıttyq qalqymaly baqylaý qurylǵylaryn alǵash ret synaqtan ótkizdi. Nátıjesinde derekterdi halyqaralyq spýtnıktik júıelerge súıenbeı jınaý jáne jetkizý múmkindigi iske asyryldy.
Ekspedıtsııa qatysýshylarynyń aıtýynsha, jańa jeli shalǵaı aımaqtardaǵy aqparat almasý máselesin sheship, polıarlyq óńirler men bıik taýly aýmaqtardy turaqty baılanyspen qamtamasyz etýge múmkindik beredi.
Buǵan deıin Qytaıda spýtnık arqyly habarlama almasýǵa arnalǵan kópshilikke qoljetimdi qyzmet iske qosylǵany habarlaǵan edik.
