Qytaı polıtsııasy Qazaqstan azamatyn nege ustady — SІM túsindirdi

ASTANA. KAZINFORM — Syrtqy ister mınıstrliginiń resmı ókili Aıbek Smadııarov Qytaı polıtsııasy Qazaqstan azamatyn nege ustaǵanyna túsinik berdi.

«Ol aqparatty bilem. Bir qyzyǵy, ol kisi Qazaqstan azamattyǵyn alǵan. Biraq birneshe jyl buryn Qytaı azamaty bolǵan kezde jol-kólik apatyna túsken. Biraq basqa tarappen problemasyn sheshpeı Qazaqstanǵa ketip qalǵan. Osy joly barǵanda jergilikti polıtsııa oǵan „osy máseleńdi shesh, sodan keıin ary qaraı júre berseń bolady“ degen talap qoıǵan», — dedi SІM resmı ókili.

Aıbek Smadııarov atalǵan azamat qazir Qazaqstanǵa aman-esen kelgenin atap ótti.

«Eshqandaı problema bolmaǵan. Ol kisi óz máselesin sheship, daýlasqan basqa tarappen jaǵdaıdy rettegennen keıin pasportyn alyp, júre bergen. Bir de bir kún qamaýǵa alynǵan da, oǵan kúsh jumsalǵan da joq. Qazir ol Qazaqstanǵa qaıtyp keldi», — dedi ol.

Buǵan deıin Qytaıdaǵy týystaryna qydyryp barǵan Qazaqstan azamaty Tursynáli Bekdáýletti Qytaı polıtsııasynyń ustaǵany málim bolǵan edi.