Brıtan barlaý qyzmeti: Qytaı parlamentte tyńshylyq jasaýǵa árekettenip jatyr

ASTANA. KAZINFORM — QHR MQM agentteri brıtan parlamentiniń múshelerinen aqparat alýǵa tyrysyp otyr. Olar bul maqsatta tanysý saıttaryn, rekrýtıng agenttikterin jáne basqa da quraldardy paıdalanyp keledi, dep habarlaıdy DW.

Bul týraly MI5 barlaý qyzmeti málim etti.

Brıtandyq MI5 qarsy barlaý qyzmeti parlament múshelerin qytaılyq agentterdiń olardan aqparat alý jáne qyzmetine yqpal etý áreketteri týraly eskertti.

Seısenbi, 18 qarashada Reuters agenttigi, BBC jáne The Guard sııaqty brıtandyq BAQ habarlaǵandaı, barlaý qyzmetiniń Qytaı tyńshylyǵy týraly eskertýin Ulybrıtanııa parlamenti eki palatasynyń (Qaýymdar palatasy jáne Lordtar palatasy) spıkerleri Lındsı Hoıl men Djon Makfoll taratty. 

Parlament depýtattaryna joldaǵan sózinde Hoıl Qytaıdyń Memlekettik qaýipsizdik mınıstrligi «olardyń atynan áreket etip júrgen kásibı tanysý saıttary, jumysqa ornalastyrý agenttikteri jáne keńesshilerdi paıdalanyp, aqparat jınaý jáne uzaq merzimdi qarym-qatynastardyń negizin qalaý» nıetimen «qaýymdastyǵymyzdyń ókilderimen belsendi túrde baılanysyp otyrǵanyn» málimdedi.

Buǵan deıin Ulybrıtanııanyń syrtqy barlaý qyzmeti MI6 jasyryn ınternette (darknet) jańa portal ashyp, shpıondar tartý júıesin iske qosqanyn jazǵan edik.