Qytaı Paralımpıada komıteti tóraǵasy: Qazaqstanda parasporttyń damýyna barlyq jaǵdaı jasalǵan
ASTANA.KAZINFORM – Qytaı Múgedekter federatsııasy (CDPF) men Qytaı Paralımpıada komıteti (NPC China) delegatsııasynyń basshysy Chen Kaı myrza Qazaqstanǵa resmı saparmen keldi.
Qytaılyq delegatsııany Qazaqstan Respýblıkasy Ulttyq Paralımpıada komıtetiniń prezıdenti Qaırat Boranbaev qarsy aldy.
Sapar aıasynda, delegatsııa Astanadaǵy «Tarlan» muz aıdyny jáne Paralımpıadalyq jattyǵý ortalyǵy syndy birqatar mańyzdy sporttyq jáne ońaltý nysandaryna bardy.
Eki el Paralımpıada komıteti tóraǵasy sportshylarmen sóılesip, olardyń aldaǵy básekelerde jaqsy nátıjeler kórsetýine tilektestik bildirdi.
Taraptar para sport, ınklıýzıvti bilim berý, jumyspen qamtý jáne medıtsınalyq ońaltý salalaryndaǵy yntymaqtastyq perspektıvalaryn talqylap, halyqaralyq bastamalar men sporttyq baǵdarlamalar aıasynda seriktestikti jalǵastyrý nıetin bildirdi.
- Qytaı Múgedekter Federatsııasy men Qytaı Paralımpıada Komıteti delegatsııasynyń basshysy Chen Kaı myrzany qabyldaý – biz úshin úlken mártebe. Qytaı tarapynyń ashyq dıalog pen paralımpıadalyq qozǵalysty birlesip damytýǵa umtylysyn joǵary baǵalaımyz. Bul sapar ekijaqty yntymaqtastyqty nyǵaıtýǵa, ozyq tájirıbe almasýǵa jáne bizdiń elderimizdegi múgedektigi bar sportshylar úshin jańa múmkindikter jasaýǵa mańyzdy qadam bolady dep senemin,- dedi QR Ulttyq Paralımpıada komıtetiniń prezıdenti Qaırat Boranbaev.
Qytaı Paralımpıada komıteti tóraǵasy Qazaqstandaǵy Para sporttyń damýyn joǵary baǵalap, osy sapardan óte keremet áser alǵanyn jetkizdi.
– Bul jolǵy saparymyzdyń basty maqsaty eki el arasyndaǵy yntymaqtastyqty tereńdetip, tájirıbemen almasý. Qazaqstanda Parasporttyń damýyna barlyq jaǵydaı jasalǵan eken. Sonymen qatar, sportshylardyń jeńiske degen jigeri maǵan tereń áser qaldyrdy,- dedi Chen Kaı myrza.
Aıta keterligi, 2025 jyldyń tamyz aıynda Qazaqstan alǵash ret 45 eldiń qatysýymen Azııa Paralımpıadalyq Komıtetiniń Bas Assambleıasyn ótkizedi. Bul oqıǵa eldiń paralımpıadalyq qozǵalystaǵy halyqaralyq bedelin arttyrýǵa baǵyttalǵan mańyzdy qadam bolmaq.
Osyǵan deıin habarlaǵanymyzdaı, Italııanyń Venetsııa qalasynda HHV Qysqy Olımpıada jáne Paralımpıada oıyndary medaldarynyń saltanatty tanystyrylymy ótti.
