Qytaı Panama kanalyndaǵy porttardyń satylýyna tekserý júrgizýdi talap etip otyr

ASTANA. KAZINFORM – Qytaıdyń naryqty qadaǵalaý jónindegi bas vedomstvosy Panama kanalyndaǵy Balboa, Krıstobal sııaqty ózge de aılaqtardyń satylýyna jan-jaqty monopolııaǵa qarsy tekserý júrgizýdi talap etip otyr, dep habarlaıdy DW.

Qytaıdyń naryqty retteý jónindegi memlekettik basqarmasy (SAMR) birqatar porttyń satylýyna jan-jaqty monopolııaǵa qarsy tekserý júrgizýdi talap etip otyr.

- Kásiporyndardy keńeıtý isin ruqsatsyz júrgizýge bolmaıdy, oǵan zańdyq jaýapkershilik bar, - delingen basqarmanyń jeksenbi, 27 sáýir kúngi málimdemesinde dep jazady Reuters.

Gonkongtik CK Hutchison kompanııasy bar osy mámilege qatysýshylar monopolııaǵa qarsy tekserýden jaltaryp ketpeýi kerek, deıdi ondaǵylar.

Naýryz aıynyń basynda habarlanǵandaı, AQSh prezıdenti Donald Tramptyń qysymymen gonkongtik Hutchison Holdings kompanııalar toby Panama kanalynyń eki shetindegi Balboa men Krıstobal sııaqty porttardy satýǵa májbúr bolǵan. Operatordyń 90 paıyz aktsııalaryn Blackrock ınvestory basqaratyn amerıkalyq konsortsıým alýy kerek bolǵan.

Túrli baǵalaýlar boıynsha, mámileniń quny 19-dan 23 mlrd dollarǵa deıin jetedi.

AFP agenttiginiń habarlaýynsha, Hutchison holdıngimen jasalǵan atalǵan porttardy basqarý jónindegi kelisim 2021 jyly avtomatty túrde 25 jylǵa sozylǵan bolatyn.

Saýda aınalymynyń shektelýinen qaýiptenetin Beıjiń bul mámileni qatty synap otyr.

Tramp AQSh úshin Sýets jáne Panama kanaldarynan jeńildikti talap etip otyr

Jýyrda AQSh prezıdenti Panama men Sýets kanaldary ákimshiliginen Qurama Shtattardyń týymen ótetin áskerı jáne azamattyq kemelerden aqy almaýdy talap etken.

- AQSh-tyń áskerı bolsyn, azamattyq bolsyn, kemeleriniń Sýets jáne Panama kanaldarynan eshqandaı tólemsiz ótýine ruqsat etilýi kerek. AQSh-syz bul kanaldar bolmaıtyn edi,- dep jazdy Aq úı basshysy TruthSocial áleýmettik jelisinde.

Tramp joǵary memlekettik laýazymǵa saılanardan buryn-aq Panama kanalynyń ákimshiligine qarsy sózder aıta bastaǵan.

Saıasatker Qytaıǵa táýeldilikten arylyp, AQSh-pen tyǵyz jumys isteýdi talap etti.

Atlant jáne Tynyq muhıttaryn jalǵap jatqan Panama kanalyn AQSh 1914 jyly salǵan. 1999 jylǵa deıin AQSh 82 kılomtrlik sý dálizin baqylaýda ustap, artynan ol tolyǵymen Panamaǵa berilgen.

Ashyq derekkózderge qaraǵanda, Sýets kanaly boıynsha Tramp buryn eshteńe demegen. Óıtkeni bul XIX ǵasyrdaǵy osmandardyń yqpalyndaǵy Mysyr men Frantsııanyń jobasy bolatyn.

Qazirgi tańda Sýets kanalyna álemdik teńiz saýdasynyń 10-12 paıyzy tıesili, Panama kanalyna 5-6 paıyzy.

Osyǵan BlackRock Panama kanalyndaǵy porttardy satyp alǵaly jatqany týraly habarlanǵan edi.