Qytaı Ózbekstandaǵy kásiporyndar sany boıynsha alǵash ret Reseıdi basyp ozdy

TAShKENT. KAZINFORM - 2024 jyldyń sońynda Qytaı Ózbekstandaǵy sheteldik kapıtaldyń qatysýymen kásiporyndar sany boıynsha alǵash ret Reseıdi basyp ozdy, dep habarlaıdy ÓR Statıstıka agenttigi. 

2025 jylǵy 1 qańtardaǵy jaǵdaı boıynsha Ózbekstanda sheteldik ınvestıtsııanyń qatysýymen 14 871 kásiporyn jumys istep tur. Sońǵy bir jylda olardyń sany 5,8 paıyzǵa nemese 818-ge artqan. Onyń 3 965-i birlesken kásiporyn bolsa, 10 906-sy sheteldik.

Sheteldik kapıtaly bar kompanııalardyń sany boıynsha Qytaı birinshi orynda – 3 357 kompanııa, bul 2023 jylmen salystyrǵanda 43,6%-ǵa nemese 1 020-ǵa kóp.

Bul - jyl boıy jumys isteıtin sheteldik kásiporyndar sanynyń rekordtyq ósimi. Ótken jyldary Qytaı Ózbekstandaǵy qatysýyn salystyrmaly túrde baıaý qarqynmen keńeıtti. Atap aıtqanda, 2020 jyly olardyń sany - 147-ge, 2021 jyly - 128-ge, 2022 jyly - 214-ke, 2023 jyly 196-ǵa ósken.

Reseı ekinshi orynǵa túsip ketti. Reseı kapıtalynyń qatysýymen kompanııalar sany 3,5%-ǵa – 3 044-ten 2 937-ge deıin (-107) azaıdy.

2023 jyly ol 112 kompanııaǵa deıin qysqarǵan bolatyn.

2022 jyly Reseı shet elderdiń kóptegen sanktsııalaryna tap bolǵan kezde Ózbekstandaǵy qatysýyn kúrt keńeıtti, nátıjesinde Reseıdiń qatysýymen bir jylda 847-ge (ótken jyldary 216 jáne 256) ósken edi.

Jumys istep turǵan kásiporyndar sanynyń tómendeýi basqa elderde de baıqaldy: Túrkııa — 1 826 kásiporyn (-3% nemese -57 kásiporyn), Qazaqstan — 1 041 (-2,2% nemese -23), Ońtústik Koreıa — 644 (-12,5% nemese -92), AQSh — 304 (-2,9% nemese -9).

Jalpy, sońǵy eki jylda Túrkııa kapıtaly qatysatyn kásiporyndar sany 378-ge, Qazaqstan — 217-ge, Ońtústik Koreıa — 286-ǵa, AQSh — 50-ge qysqardy.

TMD elderi kompanııalary sanynyń azdap óskeni baıqalady. Mysaly, Tájikstannan 314 (+12,9%), Ázirbaıjannan 263 (+11%), Qyrǵyzstannan 287-ge (+2,9%) kóbeıdi.

Basqa elderdiń kapıtaly bar kásiporyndar sany 631-ge – 3485-ten 2854-ke (-18,1%) azaıdy.

Eske sala keteıik, Ózbekstanda qazaqstandyq kapıtalmen myńnan astam kásiporyn jumys isteıdi.