Qytaı oı kúshimen basqarylatyn robot-ıt jasap shyǵardy

ASTANA. KAZINFORM — Sıan kólik ýnıversıtetiniń professory Sıýı Gýanhýa bastaǵan ǵalymdar toby neırotehnologııalar kómegimen tórt aıaqty robottardy basqarýdyń ozyq jobasyn usyndy, dep habarlaıdy Keji Ribao. 

Bul tehnologııa paıdalanýshyǵa oı kúshiniń kómegimen robot-ıtke baǵytty anyqtaýǵa, kedergilerdi aınalyp ótýge jáne naqty jerge jetý pármenin berýge múmkindik beredi.

— Buǵan deıin biz elektroentsefalogramma sıgnaldary arqyly robottyń negizgi qozǵalysyn basqara aldyq. Endi neırobasqarýdy avtonomdy navıgatsııa fýnktsııalarymen biriktirdik, — dep túsindirdi joba menedjeri.

Onyń aıtýynsha, tehnologııa chıpterdi engizý qajettiligin joıatyn «mı-kompıýter» ınvazıvti emes ınterfeısine negizdelgen. Júıe mıdaǵy neırondar belsendiligi kezinde paıda bolatyn elektr sıgnaldaryn oqyp, olardy jabdyqqa arnalǵan joǵary dáldiktegi komandalarǵa aınaldyrady.

— Bolashaqta robot-ıt múmkindigi shekteýli adamdar úshin taptyrmas kómekshige aınalýy múmkin. Bul tehnologııa qartaıyp otyrǵan qoǵam jaǵdaıynda jalǵyzbasty qart adamdarǵa ilesip júrý jáne medıtsınalyq kómek kórsetýden bastap ońaltý jattyǵýlaryna deıin keńinen qoldanylýy múmkin, — dep túıindedi ol.

Osyǵan deıin qytaılyq kompanııa GAE modelindegi adam tárizdi robotty tanystyrǵanyn jazǵan bolatynbyz.