Qytaı Ortalyq Azııa ósimdikteri týraly kóptildi derekter bazasyn qurmaqshy

ASTANA.KAZINFORM - Shyńjań ekologııa jáne geografııa ınstıtýty (XIEG) Ortalyq Azııanyń qurǵaq aımaqtaryndaǵy ósimdikterdiń bıoalýantúrliligi týraly kóptildi málimetter bazasyn qurýdy kózdep otyr, dep habarlaıdy Sınhýa.

Joba Qazaqstan, Armenııa, Grýzııa, Ázerbaıjan jáne aımaqtaǵy basqa elderdiń ǵylymı mekemelerimen birlesip júzege asyrylady. Málimetter qory qytaı, aǵylshyn jáne orys tilderinde qoljetimdi bolady jáne ǵylymı aqparat almasýdaǵy olqylyqtardy toltyrýǵa arnalǵan.

Jańa platforma pánaralyq zertteýlerdiń, sondaı-aq ekologııa jáne turaqty damý salasyndaǵy sheshimderdi qoldaýdyń mańyzdy quraly bolmaqshy.

XIEG zertteýshisi Lı Ventszıýn 8 tamyzda Qashqarda aıaqtalǵan bıologııalyq ártúrlilik jónindegi halyqaralyq konferentsııada málimdegendeı, Qazaqstannyń Ekologııa jáne tabıǵı resýrstar mınıstrliginiń Botanıka jáne fıtoıntrodýktsııa ınstıtýtymen 300 myń gerbarıı úlgisin birlesip tsıfrlandyrý týraly kelisimge qol jetkizildi.

«Biz 2026 jylǵa qaraı bir mıllıon ósimdik úlgisin tsıfrlandyrýdy aıaqtaýdy josparlap otyrmyz, bul bıoalýantúrliliktiń jan-jaqty derekqoryn qurýdy kózdeıdi. 2030 jylǵa qaraı joba «Bir beldeý, bir jol» bastamasy elderine taralady», - dep qosty Lı.

Bastama 2022 jyly XIEG negizin qalaǵan Qurǵaq jerler bıoártúrliligin saqtaý alıansy aıasynda 11 ulttyq ınstıtýt pen halyqaralyq uıymdardyń qoldaýymen júzege asyrylady.

Buǵan deıin Memleket basshysy bıologııalyq ártúrlilikti qorǵaý qoryn qurýdy usynǵanyn jazǵan bolatynbyz.