Qytaı – Ortalyq Azııa: mádenı kópir jáne medıa bastamalar
ASTANA. KAZINFORM — Astanada «Tatý kórshilik jáne dostyq: bolashaqqa birge qadam» Ortalyq Azııa - Qytaı gýmanıtarlyq almasý forýmy ótti. Forýmǵa memlekettik organdardyń basshylary, BAQ, ǵylymı jáne sarapshylyq qaýym ókilderi qatysty.
Forým barysynda Memlekettik keńesshi Erlan Qarın bul kezdesýdiń mańyzdylyǵyn atap ótip, munda tek Qytaı men Ortalyq Azııa elderiniń yntymaqtastyǵy ǵana emes, sonymen qatar mıllıondaǵan adamnyń taǵdyry toǵysqan ulanǵaıyr aımaqtyń bolashaǵy talqylanatynyn jetkizdi.
– Biz árdaıym ózara tıimdi áriptestik máselelerinde ortaq túsinistik taba alamyz. Memleket basshysy Qasym-Jomart Toqaev atap ótkendeı, Qytaımen jan-jaqty yntymaqtastyq – Qazaqstannyń orta merzimdi turaqty damýynyń basty faktory, – dedi Memlekettik keńesshi.
E. Qarınniń aıtýynsha, aımaqtyń basty ereksheligi – ashyqtyq, turaqty ekonomıkalyq ósim jáne gýmanıtarlyq, medıa salalaryndaǵy tyǵyz baılanys. Aqparattyq protsesterdiń róli artyp, tsıfrlyq tehnologııalar engizilip jatqan qazirgi zamanda kontent óndirý, tehnologııalarmen almasý jáne mádenı baılanysty nyǵaıtý baǵytyndaǵy birlesken jumys ózekti bola tústi.
Forýmda sóz sóılegen Qytaı Medıa korporatsııasynyń (CMG) basshysy, QHR Kommýnıstik partııasy OK úgit-nasıhat bóliminiń jetekshisiniń orynbasary Shen Haısıýn aldaǵy ýaqytta kóptegen birlesken joba men tyǵyz yntymaqtastyq kútip turǵanyn aıtty.
– Tóraǵa Sı Tszınpın Ortalyq Azııa memleketterimen qarym-qatynasqa erekshe mán beredi. Ol Qytaı árdaıym senimdi kórshi, seriktes jáne dos ekenin aıtady, – dedi Shen Haısıýn.
Onyń aıtýynsha, Qytaı Medıa korporatsııasy Ortalyq Azııa halyqtarymen dostyqty nyǵaıtýǵa bar kúshin salýdy jalǵastyrady.
– Biz Ortalyq Azııanyń jetekshi BAQ-taryndaǵy seriktestermen joǵary sapaly baǵdarlamalar jasap, «Ortalyq Azııamen tikeleı baılanys» atty aqparattyq jobalardy uıymdastyryp otyrmyz. Bul aqparat pen tájirıbe almasýǵa múmkindik beredi. Kópsalaly, kópformatty jáne kóparnaly yntymaqtastyq odan ári nyǵaıa beredi, – dedi ol.
Dıalog alańynda sóz alǵan Qazaqstannyń Mádenıet jáne aqparat mınıstri Aıda Balaeva «Bir beldeý – bir jol» bastamasynda mádenıettiń orny erekshe ekenin atap ótti.
– Bul joba – jaı ǵana aýqymdy ınfraqurylymdyq bastama emes, sonymen qatar halyqtarymyzdyń júrekterin jalǵaıtyn kópir. Gýmanıtarlyq baılanystar, mádenı birlesken bastamalar men medıa yntymaqtastyq senim men ashyq dıalog keńistigin qalyptastyrady. Sebebi medıa mádenıetti nasıhattaýda jáne halyqtarymyzdy jaqyndatatyn gýmanıtarlyq jobalardy jarııa etýde asa mańyzdy ról atqarady, – dedi Aıda Balaeva.
Forým aıasynda «Sı Tszınpınniń súıikti naqyl sózderi» jobasynyń halyqaralyq nusqasynyń tusaýkeseri ótti.
«Kıim rámiz retinde: Qytaıdan – álemge» jáne Qytaıdyń CGTN telearnasynyń jýrnalısteri Qazaqstannyń Jibek Joly/Silk Way arnasynyń qoldaýymen júzege asyrǵan «Ortalyq Azııa boıynsha úlken sapar» jobalary qorytyndylandy. Bul joba aıasynda Qazaqstandaǵy ómir týraly reportajdar serııasy túsirildi.
Sonymen qatar Qytaı men Ortalyq Azııa elderiniń jetekshi BAQ platformalarynda júretin «Men Qytaıda oqydym» baǵdarlamasynyń bastalǵany jarııalandy.
Kezdesý barysynda aqparat salasyndaǵy yntymaqtastyqty nyǵaıtý máseleleri qaraldy, sonyń ishinde forým aıasynda usynylǵan «Qytaı jáne Ortalyq Azııa elderiniń BAQ yntymaqtastyǵy bastamasy» da nazarǵa alyndy.
Eske salsaq, QR Memlekettik keńesshisi Erlan Qarın Qytaı men Ortalyq Azııanyń «Tatý kórshilik jáne dostyq: bolashaqqa birge qadam» atty gýmanıtarlyq almasý forýmynda Memleket basshysy Qasym-Jomart Toqaevtyń quttyqtaý hatyn oqyp berdi.