Qytaı ómirdi 120 jylǵa deıin uzartatyn dári jasap jatyr

ASTANA. KAZINFORM – Shenchjendegi Lonvi Biosciences qytaılyq startapy ómirdi 120 jylǵa deıin uzartatyn dári jasap jatyr, dep habarlaıdy The New York Times.

Amerıkalyq basylym atap ótkendeı, Lonvi Biosciences júzim dániniń syǵyndysynda kezdesetin qosylystarǵa negizdelgen qartaıýǵa qarsy dáriler jasap shyǵarýmen aınalysady.

Kompanııanyń málimdeýinshe, olar saý kletkalarǵa zııanyn tıgizetin qartaıǵan kletkalardy joıatyn erekshe molekýla shyǵarǵan.

Jarııalanymda júzim dánderiniń batys mádenıetinde de, dástúrli qytaı medıtsınasynda da ejelden paıdaly taǵam bolyp sanalǵany aıtylǵan.

Basylymnyń málimetinshe, Lonvi Biosciences belsendi molekýlalardyń joǵary kontsentratsııasy bar kapsýlalardy óndirý tehnologııasyn jasap shyǵarǵan.

Kompanııa óziniń tabletkalary salaýatty ómir saltymen jáne sapaly medıtsınalyq kómekpen úıleskende adamdardyń 100-den 120 jasqa deıin ómir súrýine kómektesedi dep sanaıdy.

Buǵan deıin qytaılyq dárigerler álem boıynsha alǵash ret robottandyrylǵan ota jasap, kóz torynyń astyna 4 200 shaqyrymnan astam qashyqtyqtan preparat engizgenin jazǵan edik.

Qazaqstanda 100 jáne odan da úlkenirek jastaǵy 448 azamat bar ekenin jazdyq. Eń jasy úlken qazaqstandyq Ulytaý oblysynda turady, ol 115 jasqa tolǵan týǵan kúnin atap ótti.