Qytaı Nepalǵa gýmanıtarlyq kómektiń tórtinshi partııasyn jiberdi
ASTANA. KAZINFORM — Qytaı seısenbi kúni tańerteń Nepalǵa gýmanıtarlyq kómektiń tórtinshi partııasyn joldady, dep habarlaıdy Sınhýa.
Bul týraly Qytaı Syrtqy ister mınıstrliginiń resmı ókili Mao Nın kezekti baspasóz máslıhatynda BAQ ókilderiniń Qytaıdyń Nepaldaǵy tabıǵı apat saldaryn joıýǵa kórsetip jatqan kómegi týraly suraǵyna jaýap bere otyryp málimdedi.
Gýmanıtarlyq kómektiń bul partııasyna tasymaldaý jáne jaryqtandyrý quraldary, sondaı-aq qaza tapqandardy jerleýge qajetti jabdyqtar kirdi.
— Qytaıdyń túkpir-túkpirinen Nepalǵa kómek jiberilip jatyr, — dedi Mao Nın.
Onyń aıtýynsha, Qytaıdyń Aýyldyq aýmaqtardy damytý qory zardap shekken aımaqtarǵa qyzmetkerlerin jiberip, ýaqytsha ornalastyrý pýnktterin salýǵa, sondaı-aq qajetti zattarmen qamtamasyz etýge jáne alǵashqy medıtsınalyq kómek kórsetýge atsalysyp jatyr.
Mao Nın sonymen qatar Nepaldaǵy Qytaı kásiporyndary qaýymdastyǵy tabıǵı apat saldaryn joıý jumystaryna arnalǵan qaıyrymdylyq qarajattyń alǵashqy partııasyn jaqynda tapsyrǵanyn atap ótti.
Osydan buryn qyrkúıek aıynyń basynda Qytaı Nepalǵa gýmanıtarlyq kómektiń úshinshi partııasyn jiberýge daıyndalyp jatqanyn jazǵan edik.
Nepalda 26 tamyzda bolǵan alapat sý tasqynynan qaza tapqandardy eske alý úshin dúısenbi kúni ulttyq aza tutý kúni dep jarııalandy.
Resmı málimetke qaraǵanda, Nepal men Tıbettegi tabıǵı apattan 1 300-den astam adam qaza tapqan. Taǵy 5 000-ǵa jýyq adam, onyń ishinde shetel azamattary da bar, ázirshe habar-osharsyz ketkender qatarynda.
