Qytaı-Nepal shekarasynda taǵy bir Qazaqstan azamaty izdestirilip jatyr
ASTANA. KAZINFORM — Tabıǵı apat bolǵan Nepal men Qytaı shekarasy aımaǵynda Qazaqstannyń taǵy bir azamaty izdestirilip jatyr. Bul týraly Syrtqy ister mınıstrliginiń resmı ókili habarlady.
Qazaqstandyq dıplomattar osy jaǵdaıǵa baılanysty eki eldiń memlekettik organdarymen jumys júrgizip jatyr.
– Nepal men Qytaı shekarasyndaǵy tabıǵı apat aımaǵynda bolýy múmkin Qazaqstannyń úshinshi azamatshasy týraly aqparat kelip tústi. Qazaqstandyq dıplomattar eki eldiń memlekettik organdarymen jumysty ári qaraı júrgizip jatyr, otandastarymyzdy izdestirý jalǵasyp jatyr, - dedi Syrtqy ister mınıstrliginiń resmı ókili Janbolat Úsenov.
Buǵan deıin Qytaı-Nepal shekarasynda eki qazaqstandyq týrıst izdestirilip jatqanyn jazǵan edik.
Aıta keteıik, 26 tamyzda Qytaı men Nepal shekarasyndaǵy Gımalaı taýlarynda bolǵan joıqyn tabıǵı apat eki el aýmaǵyn qamtyp, júzdegen adamnyń ómirin qıdy. Nepaldyń soltústigindegi eldi mekender men Qytaıdyń Tıbet avtonomııalyq aýdanyndaǵy Jılýn shekaralyq ótkizý beketi tasqyn men laı kóshkininen qatty zardap shekti.
Sońǵy aqparatqa sáıkes, Nepaldyń Tabıǵı apattar qaýpin azaıtý jáne basqarý jónindegi ulttyq basqarmasynyń málimetinshe, qaza tapqandar sany 579 adamǵa jetip, iz-túzsiz joǵalǵandar qatary 2 myńǵa jýyqtady.
Nepaldyń Rasýva, Nývakot jáne Dhadıng aýdandarynda bolǵan joıqyn sý tasqynynan keıin keminde 17 myń bala shuǵyl kómekke muqtaj. Bul týraly BUU Balalar qorynyń (ıÝNISEF) ókilderi málimdedi.
