Qytaı neke agenttikterine baqylaýdy kúsheıtti
ASTANA. KAZINFORM — Qytaı bıligi neke qyzmetteri naryǵyndaǵy alaıaqtyq pen zańsyz áreketterge qarsy aýqymdy memlekettik naýqandy bastady. Ol 2027 jyldyń aqpan aıyna deıin jalǵasady. Bul týraly Kazinform agenttiginiń Beıjińdegi menshikti tilshisi «Jenmın Jıbao» basylymyna silteme jasap habarlady.
Qytaıdaǵy neke qyzmetteri naryǵynyń qarqyndy damýy neke sanynyń artýyna yqpal etip otyrǵanymen, bul salanyń keńeıýi qoǵamda úlken pikirtalas týdyrǵan birqatar zań buzýshylyqtardyń kóbeıýine sebep bolǵan.
Qytaı Azamattyq ister mınıstrliginiń bastamasymen bes memlekettik vedomstvo birlesip júzege asyratyn bul shara bes kezeńnen turady. Baǵdarlama aıasynda kompanııalarǵa aýdıt júrgizý, jergilikti tekserýler uıymdastyrý, zań buzýshylarǵa qatań sanktsııalar qoldaný, sondaı-aq naýqan qorytyndysyn shyǵaryp, nátıjelerin baǵalaý josparlanǵan.
Memlekettik naýqan neke qyzmetteri naryǵyndaǵy jeti negizgi máseleni sheshýge baǵyttalǵan. Olardyń qatarynda zańsyz qyzmet kórsetý, jalǵan jarnama, jalǵan kúıeý nemese qalyńdyq arqyly jasalatyn alaıaqtyq, kelisimshart talaptaryn buzý, baǵa belgileýdegi ashyqtyqtyń bolmaýy, klıentter týraly málimetterdi jetkiliksiz tekserý jáne jeke derekterdiń taralýy bar.
Salany odan ári damytý úshin standartty kelisimshart úlgilerin engizý, klıentterdiń saýalnamalaryn mindetti túrde tekserý, naryqtyń ózin-ózi retteý tetikterin jetildirý jáne bul salaǵa degen senimdi arttyrý sharalary qarastyrylyp otyr.
Qytaı bıliginiń málimdeýinshe, neke qyzmetteri salasyna baqylaýdy kúsheıtý — otbasyn qurýǵa qolaıly jaǵdaı qalyptastyrýǵa, bala týý kórsetkishin yntalandyrýǵa jáne eldiń demografııalyq damýyn qoldaýǵa baǵyttalǵan keshendi memlekettik strategııanyń bir bóligi.
Buǵan deıin Qytaıda neke rásimderin jeńildetý jáne ony romantıkalyq sıpatta kórsetý sharalarynan keıin neke sanynyń aıtarlyqtaı óskeni habarlanǵan bolatyn.
