Qytaı ne sebepti Qazaqstannan qoı etin engizýge shekteý qoıdy
ASTANA. KAZINFORM – Aýyl sharýashylyǵy mınıstrligi ótken jyly ne sebepti Qytaıǵa Qazaqstannan qoı eti múlde eksporttalmaǵanyn túsindirdi.
2018 jyly elimizdiń 9 oblysynan Qytaıǵa qoı etin eksporttaý týraly kelisim jasalǵan bolatyn. Alaıda buǵan deıingi AShM málimetinde 2024 jyly Qazaqstan qoı etin tek Ózbekstan, BAÁ, Iran elderine shyǵarǵany jaıly jazylǵan. Osyǵan baılanysty Kazinform agenttigi mınıstrlikke resmı saýal joldap, Qytaımen arada ne jaǵdaı bolǵanyn anyqtady.
— 2024 jyly Qytaıǵa qoı etiniń jetkizilmeý sebebi: 2023 jyly Qytaı Halyq Respýblıkasynyń Bas keden basqarmasy (BKB) respýblıkada qoı sheshegi aýrýynyń tirkelýine baılanysty Qazaqstannan muzdatylǵan qoı etin ákelýge shekteýler engizdi. QR Aýyl sharýashylyǵy mınıstrligi shekteýlerdi alyp tastaýǵa umtylyp, QHR BKB-ǵa shekteýlerdi alyp tastaý boıynsha ótinishpen resmı hat jiberdi, - delingen habarlamada.
Sonymen qatar, vedomstvo osy máselege qatys jumys toby qurylǵanyn habarlady.
— Qazaqstan Respýblıkasy Aýyl sharýashylyǵy mınıstri Aıdarbek Saparovtyń QHR-ǵa saparynyń qorytyndysy boıynsha jumys toby quryldy. Onyń qyzmetiniń sheńberinde máselelerdi jedel sheshýge jáne talqylaýlar júrgizýge baǵyttalǵan eki otyrys ótti. Jumys tobynyń otyrystarynda shekteýlerdi alyp tastaýǵa qatysty máseleler qaralyp, qoı jáne eshki sheshegi boıynsha saýalnama suraldy. Saýalnama boıynsha qazaqstandyq tarap barlyq qajetti aqparatty beredi. Shekteýlerdi alyp tastaý Qytaı tarapynyń qoldanystaǵy normatıvtik qujattaryna sáıkes táýekelderdi baǵalaýynan keıin múmkin bolady, - delingen jaýapta.
Aıta keteıik, buǵan deıin Aýyl sharýashylyǵy mınıstrligi byltyr Qazaqstan qaı elderge qansha et eksporttaǵanyn málimdegen bolatyn.