Qytaı-Mıanma áýe qatynasy joıqyn zilzaladan keıin qaıta jandandy
ASTANA. KAZINFORM — Joıqyn zilzaladan keıin toqtatylǵan Qytaıdyń Kýnmın qalasy men Mıanmanyń Mandalaı qalasy arasyndaǵy áýe qatynasy qalpyna keltirildi, dep jazady Sınhýa.
Jeksenbi kúni Qytaıdyń ońtústik-batysyndaǵy ıÝnnan provıntsııasynyń ákimshilik ortalyǵy — Kýnmın men Mıanmanyń Mandalaı qalasy arasyndaǵy eki baǵyttaǵy áýe reısteri qaıta bastaldy. Bul baǵyttaǵy qatynas naýryz aıynda Mıanmada bolǵan joıqyn zilzala saldarynan ýaqytsha toqtatylǵan bolatyn.
China Eastern Airlines áýe kompanııasynyń ıÝnnan fılıalynan habarlaǵandaı, Kýnmın–Mandalaı baǵyty boıynsha MU2029/MU2030 reısteri Boeing 737 ushaǵymen oryndalady. Burynǵy jumys kestesi saqtalǵan: aptasyna tórt ret – dúısenbi, sársenbi, juma jáne jeksenbi kúnderi ushady.
28 naýryzda Mıanmada magnıtýdasy 7,9 bolatyn jer silkinisi tirkelgen edi. Tabıǵı apat saldarynan kóptegen nysan, sonyń ishinde Mandalaı áýejaıynyń ınfraqurylymy zaqymdandy. Osyǵan baılanysty áýe qatynasy ýaqytsha toqtatylǵan edi.
China Eastern Airlines kompanııasy áýe qatynasynyń qalpyna kelýi Qytaı men Mıanma arasyndaǵy ekijaqty saýda, mádenı-gýmanıtarlyq baılanys, apattan keıingi qalpyna keltirý isinde yntymaqtastyqty nyǵaıtýǵa jáne ıÝnnan provıntsııasynyń Ońtústik-Shyǵys Azııamen baılanysyn odan ári bekemdeýge septigin tıgizedi dep senim bildirdi.
Aıta keteıik, Ońtústik-Shyǵys Azııa elderi assotsıatsııasy (ASEAN) qańtar–mamyr aılarynyń qorytyndysy boıynsha Qytaıdyń eń iri saýda seriktesi bolyp qaldy. Bul kezeńde Qytaı men ASEAN arasyndaǵy taýar aınalymy 3,02 trln ıýanǵa (shamamen 422 mlrd AQSh dollaryna) jetip, ótken jyldyń sáıkes kezeńimen salystyrǵanda 9,1 paıyzǵa artty.
Budan buryn 28 naýryzdaǵy joıqyn jer silkinisinen keıin jabylǵan ıAngon-Mandalaı temirjol jelisi men Mandalaı halyqaralyq áýejaıy 7 sáýirde qaıta ashylǵanyn jazǵanbyz.
8 sáýirdegi jaǵdaı boıynsha Mıanmadaǵy jer silkinisinen qaza tapqandar sany 3,5 myńnan asty.