Qytaı muhıtty zertteýge arnalǵan ıntellektýaldy keme jasap shyǵardy

ASTANA.KAZINFORM - Shanhaıda avtonomdy navıgatsııa jáne aqyldy basqarý júıelerimen jabdyqtalǵan alǵashqy ıntellektýaldy zertteý kemesi «Týntszı» paıdalanýǵa berildi, dep habarlaıdy China Daily.

Keme Shanhaıdaǵy Týntszı ýnıversıtetiniń tapsyrysy boıynsha Qytaıdyń memlekettik keme jasaý korporatsııasy tarapynan jasalǵan. Ol teńiz ǵylymı ekspedıtsııalaryn júrgizýge, jaǵalaý qurylysy boıynsha tapsyrmalardy oryndaýǵa, teńiz jáne ınjenerlik mamandyqtar boıynsha oqıtyn stýdentterdiń taǵylymdamadan ótýin uıymdastyrýǵa arnalǵan.

Injenerlerdiń aıtýynsha, jańa ázirleme teńiz geologııasy, bıologııasy, hımııasy jáne onymen baılanysty pánder sııaqty salalarda zertteýler júrgizýge arnalǵan kóp fýnktsıonaldy qalqymaly keshen.

«Týntszı» Qytaı klassıfıkatsııa qoǵamynyń standarty boıynsha aqyldy keme mártebesin alǵan alǵashqy ǵylymı keme, dedi jobanyń bas konstrýktory Lı Chjenhýa.

Elektrli reaktıvti qozǵaltqyshy bar kemeni jaǵadan, qashyqtan basqarýǵa bolady. Ol ashyq sý aıdyndarynda avtonomdy navıgatsııamen jáne energııany basqarýdyń ıntellektýaldy júıesimen jabdyqtalǵan. «Týntszı» muzdy aımaqtardy qospaǵanda, kez kelgen aımaqtarda júre alady.

Uzyndyǵy – 81,5 m, eni – 15 m, sý tartýy – 6,9 m. Oǵan 45 adam syıady jáne 27 km/saǵ deıin jyldamdyqqa jetedi. Avtonomdy júzý dıapazony 80 000 teńiz mıli, sýda uzaqmerzimdi júre alýy 35 kúnge deıin.

Qytaılyqtar qansha zeınetaqy alatynyn jazǵan bolatynbyz.