Qytaı mototsıklderi Eýropa naryǵyn jaýlap jatyr
ASTANA. KAZINFORM – Qytaı mototsıkl óndirýshileri Eýropa naryǵyndaǵy pozıtsııasyn nyǵaıtyp, jergilikti kompanııalarmen yntymaqtastyǵyn keńeıtip keledi. Bul úrdis Mılanda ótken EICMA 2026 halyqaralyq kórmesinde aıqyn baıqaldy, dep habarlaıdy «Sınhýa» agenttigi.
Qytaı mototsıkl saýda palatasynyń málimetinshe, 2026 jyldyń alǵashqy jeti aıynda Qytaıdan Eýropaǵa eksporttalǵan mototsıklderdiń quny 1,298 mlrd dollarǵa jetken. Bul byltyrǵy sáıkes kezeńnen 17,17 paıyzǵa kóp.
Italııa, Ispanııa, Germanııa men Frantsııa qytaılyq mototsıklderdiń negizgi naryqtary sanalady. Sońǵy jyldary Qytaı brendteri Polsha, Chehııa jáne Portýgalııada da óz pozıtsııasyn nyǵaıtqan.
Ispanııanyń Anesdor qaýymdastyǵynyń deregine sáıkes, 2026 jyldyń alǵashqy jartysynda qytaılyq brendterdiń el naryǵyndaǵy úlesi 28 paıyzǵa jetken. Al Portýgalııada CFMOTO, Voge jáne Zontes markalary 2025 jyly jańadan tirkelgen mototsıklder sany boıynsha úzdik altylyqqa engen.
Sala ókilderi qytaılyq brendterdiń tanymaldyǵyn ónim sapasynyń jaqsarýymen, ınnovatsııalardyń artýymen jáne básekege qabiletti baǵasymen baılanystyrady. Sonymen qatar qytaılyq óndirýshilerdiń eksporttyq ortasha baǵasy da kóterilip keledi. Bul olardyń arzan ónim shyǵarýdan sapa men tehnologııaǵa basymdyq berýge kóshkenin kórsetedi.
Eýropalyq dılerlerdiń pikirinshe, qytaılyq kompanııalar jańa tehnologııalardy engizýde jáne ónimdi jetildirýde ıkemdilik tanytady. Keıbir modelderi japondyq óndirýshilermen básekege túse alatyn deńgeıge jetken.
Qytaı brendteriniń halyqaralyq jarystardaǵy jetistikteri de olardyń bedelin arttyryp otyr. 2026 jyly ZXMOTO jáne CFMOTO markalary birqatar jarysta jaqsy nátıje kórsetken.
Sonymen qatar Qytaı men Eýropa arasyndaǵy óndiristik yntymaqtastyq keńeıip keledi. Máselen, bıyl shildede CFMOTO ıtalııalyq Brembo kompanııasymen strategııalyq áriptestik týraly kelisimge qol qoıdy. Taraptar ónim ázirleý jáne jańa tehnologııalardy engizý baǵytynda birlesip jumys isteıdi.
Qytaı mototsıkl óndirisiniń damýy eýropalyq qosalqy bólshek óndirýshilerine de jańa múmkindikter ashyp otyr. Ásirese tejegish, aspa, shına jáne elektrondyq basqarý júıelerine suranys artyp keledi.
Italııalyq Ducati kompanııasynyń ókili Fabrıtsıo Katstsolı Qytaı mototsıkl ónerkásibiniń damýy búkil salaǵa oń áser etetinin atap ótti. Onyń aıtýynsha, bul mototsıkl minýshiler sanyn kóbeıtip, mototsıkl mádenıetine degen qyzyǵýshylyqty arttyrady.
Sarapshylar Qytaı óndirýshileriniń tehnologııalyq áleýeti ósken saıyn olardyń Eýropa naryǵyndaǵy yqpaly da kúsheıe túsetinin aıtady. Sonymen birge halyqaralyq jarystar men óndiristik seriktestik eki tarap úshin de jańa múmkindikterge jol ashady.
Aıta keteıik, buǵan deıin Qyrǵyzstan halqy Qytaıǵa poıyzben qatynaı alatynyn jazdyq.
