Qytaı Mońǵolııaǵa óteýsiz áskerı kómek kórsetti
ASTANA. KAZINFORM — Qytaı Qorǵanys mınıstrligi Mońǵolııaǵa óteýsiz áskerı kómek berdi, dep habarlaıdy Montsame.
Mońǵolııa men Qytaı Halyq Respýblıkasy arasyndaǵy jan-jaqty strategııalyq áriptestik jáne qorǵanys salasyndaǵy yntymaqtastyq aıasynda Qytaı Qorǵanys mınıstrligi Mońǵolııaǵa áskerı tehnıka men jabdyqtardy óteýsiz áskerı kómek retinde tabystady.
Osyǵan baılanysty mońǵol tarapyna avtobýstar berildi. Olar Mońǵolııa Qorǵanys mınıstrliginiń jeke quramyn tasymaldaý jaǵdaıyn jaqsartýǵa, mınıstrlikke qarasty bólimsheler men uıymdardyń qyzmetin qamtamasyz etýge, sondaı-aq áskerı qyzmetshilerdiń kúndelikti jaýyngerlik ázirligin arttyrýǵa arnalǵan.
Saltanatty rásimde sóz sóılegen Mońǵolııanyń qorǵanys mınıstri D.Batlýt eki el basshylarynyń jetekshiligimen Mońǵolııa men Qytaı arasyndaǵy jan-jaqty strategııalyq áriptestik barlyq baǵytta tabysty damyp kele jatqanyn atap ótti.
Sondaı-aq, ol Mońǵolııa Premer-mınıstri N.Ýchraldyń jáne onyń orynbasary N.Nomtoıbaıardyń Qytaıǵa jasaǵan saparlary, sondaı-aq Qytaıdyń Syrtqy ister mınıstri Van I men onyń orynbasary Sýn Veıdýnnyń Mońǵolııaǵa saparlary eki eldiń ekijaqty qarym-qatynasty damytýǵa erekshe mán beretinin kórsetkenin aıtty.
Ol Qytaı Qorǵanys mınıstrligi usynǵan óteýsiz áskerı kómektiń Mońǵolııa Qarýly kúshteriniń áleýetin nyǵaıtýǵa, áskerı tehnıka men jabdyqtardy jańartýǵa naqty qoldaý ekenin aıtyp, Qytaı tarapyna shynaıy alǵysyn bildirdi.
Taraptar bul is-shara eki el arasyndaǵy dostyq qarym-qatynas pen ózara senimdi odan ári tereńdetýde mańyzdy mánge ıe ekenin atap ótti.
Saltanatty rásimge Qytaıdyń Mońǵolııadaǵy Tótenshe jáne Ókiletti elshisi Shen Mıntszıýan, Qytaı elshiliginiń áskerı attashesi, sondaı-aq eki eldiń qorǵanys vedomstvolarynyń basshylary men resmı ókilderi qatysty.
Osyǵan deıin Mońǵolııa Dúnıejúzilik jylqy kúnin alǵash ret halyqaralyq deńgeıde ótkizetinin jazǵanbyz.
