Qytaı Mońǵolııada mekendeıtin sırek aıý túrin qorǵaýdy qoldaıdy
ASTANA. KAZINFORM – Qytaı qoldaǵan tehnıkalyq kómek jobasy Mońǵolııanyń ulttyq qazynasy, joıylyp ketý qaýpi tóngen gobılik qońyr aıýdy (mazaalaı) saqtaýdaǵy mańyzdy kezeń boldy. Bul týraly jýyrda Sınhýa agenttigine bergen eksklıýzıvti suhbatynda «Uly Gobı» erekshe qorǵalatyn tabıǵı aýmaq ákimshiliginiń dırektory Choıjıngıın Baıarbat málimdedi, dep jazdy Sınhýa aqparat agenttigi.
Onyń atap ótýinshe, yntymaqtastyqtyń arqasynda tabıǵatty qorǵaý strategııalary aıtarlyqtaı nyǵaıtyldy, aıýlar mekendeıtin jerlerdegi jaǵdaı jaqsardy jáne baqylaý ádisteri jetildirildi.
— «Uly Gobıdiń» erekshe qorǵalatyn aımaǵynda 2018 jyldan 2024 jylǵa deıin Qytaıdyń qoldaýymen júzege asyrylyp jatqan mazaalaıdy saqtaý jobasy erekshe mańyzdy, óıtkeni bul erekshe qorǵalatyn aımaqtaǵy jabaıy tabıǵatty saqtaýǵa tehnıkalyq kómek kórsetý boıynsha sheteldik qarjylandyratyn birinshi iri bastama, — dedi Ch.Baıarbat.
Gobı aıýyna joıylyp ketý qaýpi tónip turǵany aıtyldy.
— Uly Gobı — Mońǵolııadaǵy 4,6 mln gektar aýmaqty alyp jatqan qorǵalatyn eń úlken aýmaq. Mońǵolııanyń Qyzyl kitabyna engizilip, joıylyp ketý qaýpi tóngen sútqorektilerdiń 33 túriniń 15-i osy jerde mekendeıdi, — dedi ol.
Tehnıkalyq kómektiń mańyzdylyǵyn atap ótken Ch.Baıarbat joba aıasynda mońǵol jáne qytaı ǵalymdary jeti zertteý júrgizgenin, sonyń ishinde mazaalaıdyń popýlıatsııasynyń mólsherin anyqtaý úshin genetıkalyq ádisterdi qoldanǵanyn baıandady. Buǵan deıin bar bolǵany aıýdyń 22 darasy bar dep eseptelse, sarapshylar «Uly Gobıde» shyn máninde 52 aıý meken etetinin anyqtady.
Budan bólek, joba aıasynda Mońǵolııanyń 30 tabıǵat qorǵaýshysy men sarapshysy Qytaıda oqytyldy.
Eske sala keteıik, buǵan deıin Mońǵolııada álemdegi qar barysynyń 20 paıyzy mekendeıtinin jazǵan bolatynbyz.