Qytaı myńnan astam AQSh kásipornyn kedendik tirkeýden shyǵardy

ASTANA. KAZINFORM –   Qytaıdyń Bas keden basqarmasy 16 naýryz kúni AQSh-tyń 1000-nan astam et óńdeý kásipornynyń Qytaıǵa azyq-túlik eksporttaý boıynsha kedendik tirkeýiniń kúshin joıdy. Bul shara AQSh et ónimderiniń Qytaıǵa eksporttalýyna aıtarlyqtaı áser etýi múmkin, dep habarlaıdy Lianhe Zaobao basylymy.

Qytaı Bas keden basqarmasynyń resmı saıtyndaǵy málimetke sáıkes, AQSh-tyń shoshqa, sıyr jáne qus etin óndiretin kásiporyndarynyń, sonyń ishinde Tyson Foods, Smithfield jáne Cargill sııaqty iri óndirýshilerdiń kedendik tirkeý mártebesi «jaramsyz» bolyp ózgergen.

Bul kásiporyndar 5 jyl buryn AQSh pen Qytaı arasyndaǵy saýda kelisimine sáıkes Qytaıǵa et ónimderin eksporttaýǵa ruqsat alǵan bolatyn. Alaıda Qytaı bıligi sheteldik azyq-túlik eksporttaýshylarǵa el aýmaǵynda saýda jasaý úshin kedendik tirkeýden ótýdi qosa mindetteıdi.

Basylymnyń jazýynsha, AQSh kásiporyndaryna baılanysty kedendik tirkeýdiń shamamen úshten ekisiniń merzimi aıaqtaǵan, bul tıisti kompanııalardyń Qytaı naryǵyna kirýin shekteýi, sondaı-aq ekijaqty saýdaǵa aýyr shyǵyn ákelýi yqtımal.

AQSh Aýyl sharýashylyǵy mınıstrligi Qytaıdyń Bas keden basqarmasyna tıisti kásiporyndardyń tirkeý merzimin uzartý týraly birneshe márte suranys jibergen, alaıda Qytaı tarapy jaýap bermegen.

Bıylǵy aqpan aıynda AQSh-tyń 84 kásipornynyń Qytaıdaǵy kedendik tirkeýiniń merzimi aıaqtaǵan bolatyn. Degenmen bul kásiporyndardyń ónimderi Qytaıǵa áli de jetkizilip jatyr. Biraq sala sarapshylary bul ahýaldyń qansha ýaqytqa jalǵasatynyn dáp basyp boljaı almaı otyr.

2024 jyldyń qorytyndysy boıynsha, AQSh Qytaı úshin úshinshi iri et jetkizýshi sanalady. Ótken jyly AQSh Qytaıǵa 590 myń tonna et ónimin eksporttaǵan, bul Qytaıdyń jalpy et ımportynyń 9%-y. AQSh-tyń aldynda Brazılııa men Argentına tur.

Qytaılyq kompanııa robot-bala kútýshini jasap shyǵaratynyn jazǵan bolatynbyz.