Qytaı men Soltústik Koreıa arasyndaǵy jańa kópir ashyldy
ASTANA. KAZINFORM — Qytaı men Koreı Halyq Demokratııalyq Respýblıkasy (Soltústik Koreıa) arasyndaǵy ıAlýtszıan ózenindegi jańa kópirde kólik qozǵalysy resmı túrde ashyldy. Eki el ókilderi transshekaralyq kólik jolynyń ashylý saltanatyn birge ótkizdi, dep habarlaıdy Sınhýa.
Jańa aspaly kópir Qytaıdyń soltústik-shyǵysyndaǵy Lıaonın provıntsııasynyń Dandýn qalasy men Soltústik Koreıanyń Phenan-Pýkto provıntsııasyndaǵy Sınyıdjý qalasyn baılanystyrady.
Eki tireý munarasy men eki qatar aspaly trosy bar kópirdiń júris bóliginiń eni — 28,5 metr. Ol eki baǵytta tórt jolaqty kólik qozǵalysyna arnalǵan. Kópirdiń sý betinen bıiktigi 3 myń tonnaǵa deıingi sý yǵystyratyn kemelerdiń ótýine múmkindik beredi.
Qytaı Syrtqy ister mınıstrliginiń resmı ókili Mao Nın sársenbi kúni kópirdiń ashylýy eki el arasyndaǵy saýda-ekonomıkalyq yntymaqtastyq pen halyqtar arasyndaǵy baılanysty odan ári damytýǵa yqpal etetinin málimdedi.
Onyń aıtýynsha, Qytaı men Soltústik Koreıa — ortaq taýlary men ózenderi baılanystyratyn dostas kórshiler. Al ıAlýtszıan ózeni arqyly ótetin jańa kópir eki eldiń kólik ınfraqurylymyn ózara baılanystyratyn mańyzdy nysan sanalady.
Dandýn porty — Qytaıdyń Soltústik Koreıamen shekaradaǵy eń iri saýda porty. Jańa avtomobıl kópiri salynǵanǵa deıin ıAlýtszıan ózeni arqyly ótetin eski kópir paıdalanylyp kelgen. Ol Qytaı–KHDR dostyq kópiri degen atpen de belgili. Eski kópir avtomobıl jáne temirjol qatynasyna arnalǵan, alaıda bir baǵytta salmaǵy 20 tonnadan aspaıtyn júk kólikterin ǵana ótkize alatyn.
Osy shekteýlerge baılanysty Qytaı men Soltústik Koreıa 2010 jyly qoldanystaǵy kópirden tómen qaraı jańa avtomobıl kópirin salý týraly kelisimge kelgen.
Budan buryn eki el arasyndaǵy jańa kópir 15 qazanda ashylatynyn habarlaǵan edik.
