Qytaı men Reseıdiń borttyq jýrnaldary Qazaqstan Prezıdentiniń tulpary jóninde jazdy
ASTANA. KAZINFORM – Sheteldik borttyq basylymdarda Qasym-Jomart Toqaevqa tıesili aqylteke jylqysy jaıly maqala jarııalandy.
Reseılik «Rossııa» áýe kompanııasy jýrnalynyń bıylǵy mamyr aıyndaǵy sanynda «Uly dalanyń aspanı jylqysy» («Nebesnyı kon Velıkoı stepı») degen materıal jaryq kórdi. Ol buǵan deıin Qazaqstan Prezıdentine syılanǵan aqylteke tuqymdy sáıgúlikke arnalǵan. Shandozǵa Memleket basshysynyń ózi Aqjan dep at qoıǵan bolatyn.
Aýzymen qus tistegen júırik týraly osyndaı maqala Qytaıdyń «Wings of China» borttyq jýrnalynda da jarııalandy.
Sońǵy jyldarda sheteldik basylymdardyń jýrnalısteri Qazaqstannyń sımvoldary jóninde jıi jazyp júr. Ondaı maqalalardyń borttyq jýrnaldarda paıda bolýy – Qazaqstannyń jemisti mádenı dıplomatııasynyń kórinisi. Sebebi, áýe reısi kezinde kóptegen sheteldik bıznesmen jáne týrıster álgindeı BAQ arqyly Qazaqstan jóninde málimet alady.
Shartarapqa aty shyǵyp úlgergen sáıgúlik Aqjannyń beınesi shetelderde ǵana emes, sonymen birge, Qazaqstandy áýe tasymalynyń jahandyq naryǵyna tanystyratyn basylymdar úshin de suranysqa ıe. Máselen, ol týraly maqala Air Astana kompanııasynyń Tengri jýrnalynda da basyldy. Onyń taralymyna mán bersek, negizgi halyqaralyq marshrýttarda ushatyn jolaýshylar qazaqstandyq júırik jóninde maǵlumat alady.
Osyndaı jarııalanymdardyń bas keıipkeri Aqjan – taza qandy aqylteke tuqymdy jylqy. Maqalalardyń avtorlary aqyldy tulpar Qazaqstan Respýblıkasy Prezıdenti Qasym-Jomart Toqaevtyń súıikti janýary ekenin jazady. Sonymen birge, onyń Qanatly jáne Tabys degen taza qandy aqylteke tuqymdy aıǵyr men bıeden týǵanyn súısine sýretteıdi. Odan bólek, aty qazaq tilinen aýdarǵanda, «Jany taza» degen maǵyna beretinin jetkizedi.
Sheteldik jýrnalıster, ásirese, Aqjannyń aqsary reńkine tamsanady. Álemde aqylteke jylqylarynyń tek 3%-y ǵana sondaı tústi bolady eken.
– Onyń terisi aıryqsha optıkalyq qasıetke ıe. Óte jińishke qyldary jaryqqa shaǵylysyp, jyltyrap-jarqyrap, ǵajaıyp reńge enedi, – delingen jarııalanymda.
Sonymen qatar, avtorlar dala mádenıetinde aqsary tulpar árdaıym jaqsy yrym jáne sáttilik pen órkendeýdiń sımvoly retinde baǵalanatynyn atap ótken.
Aıta keteıik, buǵan deıin Prezıdent syıǵa tartylǵan tulparlardy arnaıy baryp kórgenin jazǵanbyz.
