Qytaı men Reseı basshylary el arasyndaǵy qarym-qatynasty tereńdetýge ýaǵdalasty

ASTANA. KAZINFORM — Qytaı kóshbasshysy Sı Tszınpın Donald Tramp AQSh prezıdenti qyzmetine kiriskennen bir kún ótken soń Reseı prezıdenti Vladımır Pýtınmen beınebaılanysta Qytaı-Reseı qarym-qatynasyn joǵary baǵalady. 

Sınhýa aqparat agenttiginiń seısenbi kúni habarlaýynsha, 2025 jylǵy 21 qańtar kúni tústen keıin Qytaı tóraǵasy Sı Tszınpın Beıjińdegi Halyq májilis zalynda Reseı prezıdenti Vladımır Pýtınmen beınekonferentsııa ótkizdi.

Bul Sı Tszınpın men Pýtınniń AQSh prezıdenti Tramp bılikke qaıta kelgennen keıingi alǵashqy beıne kezdesýi.

Sı Tszınpın 2024 jyly Pýtınmen úsh kezdesý ótkizgenin jáne eki jaqtyń kóptegen mańyzdy ortaq pikirge kelgenin atap kórsetti.

Sı Tszınpın Qytaı-Reseı ekijaqty qarym-qatynastaryn jańa bıiktikke kóterý úshin Pýtınmen birge jumys isteýge daıyn ekenin málimdedi jáne eki el arasyndaǵy qarym-qatynastyń turaqtylyǵyn tıimdi paıdalaný arqyly «syrtqy belgisizdikterdi» birlesip sheshýge ýáde berdi.
Sı Tszınpın sondaı-aq Qytaı men Reseıdiń ShYU jáne «BRIKS» sheńberindegi elder arasyndaǵy yntymaqtastyqty ilgeriletý úshin birlesip jumys isteýi kerektigin aıtty.

Sınhýa aqparat agenttiginiń habarlaýynsha, beıne kezdesý barysynda Reseı prezıdenti Reseı men Qytaı arasyndaǵy ózara senim men ózara qoldaýǵa negizdelgen ekijaqty qarym-qatynastarǵa joǵary baǵa berdi. 

Pýtın Reseı men Qytaı arasyndaǵy qarym-qatynasqa «halyqaralyq jaǵdaıdaǵy ózgerister eshqashan áser etpegenin» jáne Reseı Taıvandy Qytaı terrıtorııasynyń ajyramas bóligi retinde tabandy túrde qoldaıtynyn jáne «Taıvan táýelsizdiginiń» kez kelgen túrine qarsy ekenin atap ótti.

Pýtın beınekonferentsııada «qolaısyz syrtqy ortaǵa» qaramastan Reseıdiń Qytaımen saýdasy ótken jyldyń 11 aıynda 7 paıyzǵa ósip, 220 mıllıard dollardan asqanyn aıtty. Pýtın sondaı-aq Sı Tszınpındi 9 mamyrda Máskeýde ótken Reseıdiń Jeńis kúnine arnalǵan áskerı paradqa qatysýǵa shaqyrdy.

Buǵan deıin QHR tóraǵasynyń orynbasary Qytaıdyń AQSh-pen jumys isteýge daıyn ekenin bildirgen.