Qytaı men Reseı arasyndaǵy saýda kólemi sońǵy bes jylda alǵash ret qysqardy
ASTANA. KAZINFORM – 2025 jyly Qytaı men Reseı arasyndaǵy taýar aınalymy tómendep, sońǵy bes jylda alǵash ret qysqardy. Bul týraly DW habarlady.
Reuters agenttigi Qytaıdyń Bas keden basqarmasynyń derekterine súıenip jazǵanyndaı, 2025 jyly eki el arasyndaǵy saýda kólemi 1,63 trln ıýandi (shamamen 201 mlrd eýro) quraǵan. Bul 2024 jylǵy rekordtyq kórsetkishten 6,5 paıyzǵa az. Atap aıtqanda, Qytaıdyń Reseıge eksporty 9,9 paıyzǵa, al Reseıden Qytaıǵa ımport 3,4 paıyzǵa tómendegen.
Sarapshylardyń aıtýynsha, saýda kóleminiń qysqarýyna birneshe faktor áser etken. Reseıde qytaı avtokólikterine suranystyń tómendeýi jáne Qytaıdyń Reseıden ımporttaıtyn shıki munaı qunynyń arzandaýy negizgi sebepterdiń biri bolǵan.
The Moscow Times basylymy Gaıdar ınstıtýtynyń derekterine súıene otyryp, Reseıde ýtılalymnyń ósýi men avtonesıe baǵasynyń kúrt qymbattaýy saldarynan 2025 jyly Qytaıdan satyp alynǵan avtokólikter sany 2024 jylmen salystyrǵanda eki esege azaıǵanyn jazady. Sonymen qatar Batys tehnologııalaryn almastyrýǵa arnalǵan Qytaı jabdyqtarynyń jetkizilimi de jyldyq eseppen 11 paıyzǵa qysqarǵan.
Qytaı men Reseı arasyndaǵy saýda kóleminiń buǵan deıingi qysqarýy 2020 jyly tirkelgen edi. Ol kezde bul qubylys COVID-19 pandemııasynyń saldarymen túsindirilgen.
Reseıdiń Ulttyq munaı-gaz servıstik qaýymdastyǵynyń málimetinshe, Qytaıǵa eksporttalatyn reseılik taýarlardyń negizgi bóligin munaı, tabıǵı gaz jáne kómir quraıdy. Sondaı-aq mys pen mys keni, aǵash, janarmaı jáne teńiz ónimderi de jetkiziledi.
Al Qytaı Reseıge avtokólikter, traktorlar, kompıýterler, smartfondar, ónerkásiptik jáne arnaıy jabdyqtar, sondaı-aq balalar oıynshyqtary, kıim-keshek pen aıaq kıim eksporttaıdy.
Aıta keteıik, Qytaı 2026 jyly ımporttyq kedendik bajdy ýaqytsha tómendetedi.